၂၀၁၇ခုနှစ်၊ သြဂုတ်လ ၉ ရက်

 မန္တလေးမြို့တော်စွန့်ပစ်အမှိုက်စီမံခန့်ခွဲမှု မဟာဗျုဟာနှင့် လုပ်ငန်းစီမံချက်ရေးဆွဲခြင်းဆွေးနွေးပွဲကို သြဂုတ်လ ၉ ရက် နံနက် ၉နာရီက အောင်မြေသာစံ မြို့နယ်အတွင်းရှိ Mandalay Hill Conference Hall ၌ပြုလုပ်ရာ မန္တလေးတိုင်းဒေသကြီးအစိုးရအဖွဲ့ ဝန်ကြီးချုပ် ဒေါက်တာဇော်မြင့်မောင် တက်ရောက် အားပေးချီးမြှင့်ပြီး အဖွင့်အမှာစကား ပြောကြားခဲ့သည်။

 "ဒီလိုမဟာဗျုဟာရေးဆွဲခြင်းဟာ မြို့တော်စည်ပင်တစ်ခုထဲနဲ့မဖြစ်ဘူးဆိုတာ သေချာပါတယ်၊ ဘယ်သူတွေပါသင့်သလဲဆိုတော့ မန္တလေးမြို့တော်သူ/ မြို့တော်သားတွေလည်း ပါဝင်သင့်တာပေါ့နော်၊ ဒါ့ကြောင့်လည်း မြို့တော်ပြည်သူများကိုယ်စား သက်ဆိုင်ရာမြို့နယ်တွေက လွှတ်တော်ကိုယ်စားလှယ် အသီးသီးတွေလာရောက်တက်ပါတယ်၊  မန္တလေးမြို့တော်ဟာ ယဉ်ကျေးမှုအမွေအနှစ်တွေလည်းရှိတယ်၊ ဒုတိယလူဦးရေ အထူထပ်ဆုံးလည်းဖြစ်တယ်၊ ဒါ့ကြောင့် အမှိုက်စွန့်ပစ်မှုပမာဏကများလာပါတယ်၊ အမှိုက်များကို စနစ်တကျစွန့်ပစ်ဖို့၊ သတ်မှတ်နေရာတွေမှာ စွန့်ပစ်ဖို့ရန်အတွက် အသိပညာပေးလုပ်ငန်းများလည်း တိုးပြီးဆောင်ရွက်ရန်လိုအပ်လာပါပြီ၊ စွန့်ပစ်ပုံစွန့်ပစ်နည်းတွေလည်း ပညာပေးနေတယ်၊ ဒီနေ့မန္တလေးမြို့ရဲ့ စွန့်ပစ် အမှိုက်သိမ်းမှုဟာ စည်ပင်သာယာရဲ့စနစ်ကျမှုကြောင့် တိုးတက်မှုတော့ရှိလာပါပြီ၊ ရေရှည်မျှော်မှန်းချက်အတိုင်း ရေရှည်တည်တံ့ခိုင်မြဲအောင် ဆောင်ရွက် ပါမယ်၊ စည်းမဲ့ကမ်းမဲ့၊ စနစ်မကျဘဲအမှိုက်စွန့်ပစ်နေရင် ကျွန်တော်တို့ အနာဂါတ်မျိုးဆက်သစ်တွေအတွက် ကျွန်တော်တို့မန္တလေးမြို့ကြီးဟာ သန့်ရှင်းသောမြို့တော်ကြီးအဖြစ် ရပ်တည်နိုင်မှာမဟုတ်ပါဘူး"ဟု တိုင်းဒေသကြီးဝန်ကြီးချုပ် ဒေါက်တာဇော်မြင့်မောင်က အဖွင့်အမှာစကားတွင် ထပ်လောင်းပြောကြားသည်။

 မဟာဗျုဟာသည် မန္တလေးမြို့တော်စည်ပင်သာယာရေးကော်မတီ၏ အမှိုက်စွန့်ပစ်ပစ္စည်းသိမ်းဆည်းရေးနှင့် ခွဲခြားစွန့်ပစ်ရေးကို မြှင့်တင်သည့် အစီအမံ များနှင့် ချဉ်းကပ်မှုနည်းလမ်းများကိုဖော်ထုတ်ရန်၊ နောက်ဆုံးအပြီးသတ်ပြုလုပ်ခြင်းနှင့် စွန့်ပစ်ပစ္စည်းများကို စနစ်တကျ မှန်ကန်စွာသိမ်းဆည်းမှုနှင့် စွန့်ပစ်ပစ်မှုကို အကောင်းဆုံးလုပ်ဆောင်နိုင်ရန်၊ ရေဆိုးစွန့်ပစ်မှုနှင့် စွန့်ထုတ်ဓါတ်ငွေ့များကို ထိရောက်စွာ ထိမ်းသိန်းခြင်းကို အကောင်းဆုံး လုပ်ဆောင်နိုင်ရန် ရည်ရွယ်သည်။

 "မန္တလေးမြို့ရဲ့အားသာချက်က နိုင်ငံခြားခရီးသွားဧည့်သည်တွေကို စွဲဆောင်နိုင်တဲ့နေရာတစ်ခုဖြစ်လို့ သူတို့တွေ ဝင်ထွက်သွားလာနေကြတဲ့ နေရာ လမ်းကြောင်းတွေမှာ အမှိုက်သိမ်းဆည်းမှုတွေ၊ သန့်ရှင်းရေးစနစ်တွေကောင်းဖို့လိုအပ်ပါတယ်၊ မြို့တော်ကြီး သန့်ရှင်းသပ်ရပ်ပြီး တိုးတက်ကောင်းမွန်ရန် အတွက် ကျွန်တော်တို့တွေမှာ တာဝန်ရှိလာပါပြီ၊ အနာဂါတ်မျိုးဆက်သစ်တွေအတွက် အရွယ်ရောက်လာတဲ့အခါ ငါတို့ မန္တလေးမြို့တော်ကြီးကို Clean, Green, Smart City ဖြစ်အောင် ကျွန်တော်တို့တွေမှာ တာဝန်ရှိသလို ဌာနဆိုင်ရာအားလုံးမှာလည်း တာဝန်ရှိပါတယ်၊ အားတက်သရော ပါဝင်ဆွေးနွေး ကြပါ၊ အသိစိတ်ဓါတ်နဲ့ဝိုင်းဝန်းဆောင်ရွက်ပေးစေလိုပါတယ်"ဟု ဝန်ကြီးချုပ်ဒေါက်တာဇော်မြင့်မောင်က ဆက်လက်ပြောကြားသည်။

 ယင်းနောက် သယံဇာတနှင့်သဘာဝပတ်ဝန်းကျင်ထိမ်းသိန်းရေးဝန်ကြီးဌာန၊ ပတ်ဝန်းကျင်ထိမ်းသိန်းရေးဦးစီးဌာန ညွှန်ကြားရေးမှူးချုပ် ဦးလှမောင်သိန်း က မန္တလေးမြို့တော်စွန့်ပစ်အမှိုက်စီမံခန့်ခွဲမှုမဟာဗျုဟာတိုးတက်ရေး အလုပ်ရုံဆွေးနွေးပွဲနှင့်ပတ်သက်၍ ရှင်းလင်းအမှာစကားပြောကြားပြီးနောက် CCET (Centre for Collaboration Environmental Techonology)မှ Director Mr.Kazunobu Orogawa ကအမှာစကားပြောကြားသည်။ ၎င်းနောက် မြို့တော်စည်ပင်သာယာရေးကော်မတီ၊ သန့်ရှင်းရေးဌာန၊ ဌာနမှူး ဦးလှမျိုးက မန္တလေးမြို့တော်စွန့်ပစ်အမှိုက်စီမံခန့်ခွဲမှု လက်ရှိအခြေအနေကို အသေးစိတ်ရှင်းလင်းတင်ပြီးနောက် ကော်မတီဝင် ဒေါက်တာ သစ်ဆင်းက မဟာဗျုဟာစီမံချက်ကို ရှင်းလင်းတင်ပြသည်။ ယင်းနောက် အခမ်းအနားသို့ တက်ရောက်လာကြသောသူများက သိရှိလိုသောအကြောင်းအရာများ၊ ဆွေးနွေးလိုသောအကြောင်းအရာများကို တင်ပြဆွေးနွေးခဲ့ကြသည်။

 အဆိုပါအခမ်းအနားသို့ မန္တလေးတိုင်းဒေသကြီး လွှတ်တော်ဥက္ကဋ္ဌနှင့်ဒုတိယဥက္ကဋ္ဌ၊ တိုင်းဒေသကြီးအစိုးရအဖွဲ့ဝင် ဝန်ကြီးများ၊ မြို့နယ်များအလိုက် လွှတ်တော်ကိုယ်စားလှယ်များ၊ မန္တလေးမြို့တော်စည်ပင်သာယာရေးကော်မတီမှ ကော်မတီဝင်များနှင့် ဌာနမှူးများ၊ ဖိတ်ကြားထားသည့် ဌာနဆိုင်ရာများ၊ CCET (Centre for Collaboration Environmental Techonology)မှ တာဝန်ရှိသူများ၊ မြို့တော်စည်ပင်မှဝန်ထမ်းများ တက်ရောက်ကြသည်။