၂၀၁၈ ခုနှစ်၊ ဇူလိုင်လ ၃ ရက်

 မြန်မာနိုင်ငံ၏ အင်အားအများဆုံး ထုထည်အကြီးမားဆုံးဖြစ်သည့် အမျိုးသမီးများ၏ဖွံ့ဖြိုးတိုးတက်ရေးကို လုပ်ပေးခြင်းသည် နိုင်ငံတော်တည်ဆောက်ရေး အတွက် အရေးကြီးသည့် လုပ်ငန်းဖြစ်ကြောင်း ဇူလိုင်လ ၃ ရက်နေ့ နံနက် ၉ နာရီက မြို့တော်ခန်းမတွင် မန္တလေးတိုင်းဒေသကြီး အမျိုးသမီးကော်မတီမှ ဦးဆောင်ကျင်းပသည့် မြန်မာအမျိုးသမီးများနေ့အခမ်းအနားတွင် မန္တလေးတိုင်းဒေသကြီးအစိုးရအဖွဲ့ ၀န်ကြီးချုပ် ဒေါက်တာဇော်မြင့်မောင်က အဖွင့်အမှာစကားတွင် ပြောကြားခဲ့သည်။

 ၀န်ကြီးချုပ် ဒေါက်တာဇော်မြင့်မောင် အဖွင့်အမှာစကားပြောကြားရာတွင် "ယခင်က ကျွန်တော်တို့အမျိုးသားများဟာ အမျိုးသမီးများအပေါ်မှာ နည်းလမ်း ပေါင်းစုံနဲ့လွှမ်းမိုးခဲ့ကြတယ် အင်အားအရရော၊ စိတ်ပိုင်းဆိုင်ရာအရရော၊ အခွင့်အရေးပိုင်းဆိုင်ရာအားလုံးကို လွှမ်းမိုးခဲ့ကြတယ်။ ၂၀ ရာစုအစပိုင်းမှာ အမျိုးသမီးအရေးလှုပ်ရှားမှုများပေါ်လာတယ်၊ ပထမဆုံးက ဘာလှုပ်ရှားလည်းဆိုတော့ ကိုယ့်အစိုးရကို မဲပေးခွင့်ရဖို့ အမျိုးသမီးများ စလှုပ်ရှားကြတယ်၊ ၁၉၀၅ ခုနှစ်ကစပြီး နိုင်ငံတကာမှာ အမျိုးသမီးများ မဲပေးခွင့်လှုပ်ရှားလာကြရာ ၁၉၁၀၊ ၁၉၁၁၊ ၁၉၁၂၊ ၁၉၁၃ ဥရောပ၊ အမေရိကတို့မှာ မဲပေးခွင့်ရတယ်၊ ဒါတောင် အသက်ကန့်သတ်ချက်နဲ့ပေးရတယ်၊ အသက် ၃၀ ပြည့်ပြီးမှ ပေးရတဲ့နိုင်ငံတွေရှိတယ်၊ အဲဒါတွေကို ၀ိုင်းဝန်းတိုက်ဖျက်ရင်းနဲ့ ၁၈ နှစ် ပြည့်ပြီး အမျိုးသမီးများ မဲပေးလာရတယ်၊ ဒါက အခွင့်အရေးတစ်ရပ်ရဖို့ရာ မကြိုးပမ်းပဲနဲ့မရဘူး၊ ၂၀ ရာစုကစလိုက်တဲ့ အမျိုးသမီးများ မဲပေးခွင့်ကစပြီး အမျိုးသမီးတန်းတူအခွင့်အရေးကို အရှိန်အဟုန်ရလာတယ် နိုင်ငံတကာကလဲ အမျိုးသမီးများအခွင့်အရေးကို အာရုံစိုက်လာတယ်၊ အမျိုးသမီးများနဲ့ ပတ်သတ်တဲ့မူဝါဒတွေ၊ အမျိုးသမီးတွေဘ၀မြှင့်တင်ဖို့လိုတယ်၊ အမျိုးသမီးတွေဘ၀ကာကွယ်ဖို့လိုတယ်၊ ကျွန်တော်တို့ အမျိုးသမီးများအခွင့်အရေးကို စတင်ဆောင်ရွက်တာ ၁၉၉၆ ခုနှစ်(CEDAW)ကို လက်မှတ်ရေးထိုးပြီးတော့မှ အရှိန်အဟုန်နဲ့ အမျိုးသမီးအခွင့်အရေးကာကွယ်ဖို့ ဆောင်ရွက်ခဲ့တာ၊ ကျွန်တော်တို့နိုင်ငံမှာတော့ မူဝါဒ(၁၂)ရပ်ချမှတ်ပြီး ဆောင်ရွက်နေပါတယ်"ဟု ပြောကြားခဲ့သည်။

 ဆက်လက်ပြီး ၀န်ကြီးချုပ်က "အမျိုးသမီးတွေကို ကာကွယ်ဖို့အရေးကြီးပါတယ်၊ ဘာကြောင့်လဲဆိုတော့ နိုင်ငံရဲ့အင်အားစုတစ်ခုဖြစ်နေလို့ဘဲ၊ အလုပ် လုပ်နိုင်တဲ့အင်အား ၁၅ နှစ်ကနေ ၄၅ နှစ်ကြား ကျွန်တော်တို့ မန္တလေးတိုင်းအတွင်းမှာ အင်အားအများကြီးရှိပါတယ်၊ အင်အားအရကြည့်လိုက်မယ်ဆိုရင် အမျိုးသမီးထုဟာ ကျွန်တော်တို့မန္တလေးတိုင်းအတွင်းမှာရော တစ်နိုင်ငံလုံးမှာပါထုနဲ့ထည်နဲ့ရှိတယ်၊ နိုင်ငံတစ်နိုင်ငံဖွံ့ဖြိုးတိုးတက်ဖို့ဆိုရင် တစ်ဖက်စောင်းနင်း တစ်ခုတည်းပေါ်မှာလုပ်လို့မရတော့ဘူး အမျိုးသမီးထုဖွံ့ဖြိုးတိုးတက်ရေးကိုလုပ်ပေးမှ နိုင်ငံတည်ဆောက်ရေးအတွက် အရေးကြီးလာတယ်၊ ဒါကြောင့် လည်း နိုင်ငံတော်က မူဝါဒ(၁၂)ရပ်ချမှတ်ကာ ဆောင်ရွက်နေပါတယ် အမျိုးသမီးတွေဖွံ့ဖြိုးတိုးတက်မှုနဲ့ပတ်သတ်ပြီးတော့ နည်းလမ်းပေါင်းစုံ အဖွဲ့အစည်း ပေါင်းစုံက လုပ်နေတာရှိတယ်၊ အားလုံးဟာ နောက်ဆုံးမှာ တိုင်းပြည်အတွက်လုပ်နေတာဆိုတဲ့ ရည်မှန်းချက်တွေရှိတယ်၊ တိုင်းပြည်အတွက် ရည်မှန်းချက် ဆိုတာထားပြီး အင်အားဖြစ်တဲ့ အမျိုးသမီးတွေကိုမြှင့်တင်ပေးခြင်းဟာ နိုင်ငံကိုတည်ဆောက်နေခြင်းဖြစ်တယ်ဆိုတဲ့ ရည်မှန်းချက်တစ်ခုထားပြီးတော့ စေတနာသန့်ဖို့လိုတယ်၊ ကိုယ်ကျိုးမဖက်ဖို့လိုတယ်၊ တိုင်းပြည်တည်ဆောက်ရေးဟာ ငါတို့ဟာ တစ်ဖက်တစ်လမ်းမှပါဝင်နေတယ်ဆိုတာ သိဖို့လိုတယ် ကျွန်တော်တို့ မြန်မာနိုင်ငံရဲ့ခံယူချက် ကျင့်သုံးချက်ကိုက ကံကောင်းပါတယ် အမျိုးသမီးတွေကိုဦးစားပေးပါတယ် ဒီနေ့ခေတ်မှာလဲ အမျိုးသမီးတွေဟာ နိုင်ငံရေးနယ်ပယ်မှာ ကြည့်ကြည့်၊ စီးပွားရေးနယ်ပယ်မှာ ကြည့်ကြည့်၊ လူမှုရေးနယ်ပယ်မှာ ကြည့်ကြည့်၊ ခေါင်းဆောင်တစ်ချို့ဟာ အမျိုးသမီးတွေ ဖြစ်တယ်၊ ယနေ့တစ်ကမ္ဘာလုံးမှာ အမျိုးသမီးခေါင်းဆောင်တွေ အများကြီးပေါ်ထွက်လာတယ်၊ ကျွန်တော်တို့ မြန်မာနိုင်ငံမှာလည်း ဒီမိုကရေစီ ပြုပြင်ပြောင်းလဲရေးမှာ ဦးဆောင်နေတာ အမျိုးသမီးပါ၊ ဒါက ကျွန်တော်တို့ ဘယ်လိုမှငြင်းမရဘူး ကမ္ဘာပေါ်မှာ ထင်ရှားကျော်ကြားသူ(၁၀၀)ထဲမှာ ပါဝင်ခဲ့တဲ့ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ဖြစ်ပါတယ် မြန်မာ့နိုင်ငံရေးခရီးမှာ၊ ဒီမိုကရေစီခရီးမှာ၊ ကြံ့ကြံ့ခံပြီးတော့ နိုင်ငံတကာရဲ့ အသိအမှတ်ပြုခံရတဲ့ ဒီမိုကရေစီခေါင်းဆောင်ဖြစ်နေတာလည်း ဒေါ်အောင်ဆန်းစုကြည်ပါ ကျွန်တော်တို့ မြန်မာနိုင်ငံအမျိုးသမီးများအနေနဲ့ ဘာမှ ဂုဏ်ငယ်စရာမရှိဘူး၊ အားငယ်စရာမရှိဘူး၊ နိုင်ငံရေးနယ်ပယ်မှာ ခေါင်းဆောင်ရှိနေခဲ့သလို စီးပွားရေးနယ်ပယ်မှာလဲ စီးပွားရေးစွမ်းဆောင်ရှင်တွေ ပေါ်ထွက်လာတယ် အားလုံးဟာ တူညီတဲ့ရည်မှန်းချက်ရှိရမယ်၊ အကွဲကွဲအပြားပြားလုပ်နေလို့မရဘူး၊ အဖွဲ့အစည်းတစ်ခုကိုကိုယ်စားပြုဖို့မဟုတ်ဘူး၊ နိုင်ငံကိုကိုယ်စားပြုဖို့၊ နိုင်ငံ့ကောင်းကျိုးလုပ်ဖို့လိုပါတယ်၊ နိုင်ငံဂုဏ်သိက္ခာကို တိုးတက်အောင်လုပ်ဖို့လိုပါတယ်၊ အင်အားများနေတဲ့၊ အရေအတွက် များနေတဲ့ အမျိုးသမီးထုကြီးဟာ နိုင်ငံရဲ့ငြိမ်းချမ်းရေးလုပ်ငန်းစဉ်ကြီးမှာ ပါဝင်ဖို့လိုပါတယ်၊ နိုင်ငံတော်အစိုးရရဲ့ရည်မှန်းချက်ပန်းတိုင်ဖြစ်တဲ့ ငြိမ်းချမ်းရေးမှာ ပါဝင်လှုပ်ရှားပါလို့ တိုက်တွန်းလိုပါတယ်"ဟု ပြောကြားခဲ့သည်။

 အဆိုပါ မြန်မာအမျိုးသမီးများနေ့အခမ်းအနားတွင် မန္တလေးတိုင်းဒေသကြီး အမျိုးသမီးကော်မတီဝင် ဒေါ်လှိုင်ယဉ်နွယ်က မြန်မာနိုင်ငံလုံးဆိုင်ရာ အမျိုးသမီးကော်မတီပေါ်ပေါက်လာပုံအကြောင်း စာတမ်းဖတ်ကြားပြီး၊ နိုင်ငံဂုဏ်ဆောင်နှင့် တိုင်းဒေသကြီးဂုဏ်ဆောင် ထူးချွန်ဆုရရှိသူများအား ၀န်ကြီးချုပ်နှင့်တာဝန်ရှိသူများက ဆုများချီးမြှင့်ကြသည်။ ယင်းအခမ်းအနားတွင် Women Activist Group မှ သံချပ်ဖြင့် တင်ဆက်ဖျော်ဖြေခြင်းအပြင် တိုင်းဒေသကြီးအမျိုးသမီးကော်မတီမှ ပြခန်းများဖြင့် ခင်းကျင်းပြသခဲ့သည်။

 မြန်မာအမျိုးသမီးများနေ့အခမ်းအနားသို့ တိုင်းဒေသကြီးဝန်ကြီးချုပ်နှင့် အစိုးရအဖွဲ့ဝင်ဝန်ကြီးများ၊ တိုင်းဒေသကြီးလွှတ်တော်ဥက္ကဌနှင့် လွှတ်တော် ကိုယ်စားလှယ်များ၊ တိုင်းဒေသကြီးအမျိုးသမီးကော်မတီဥက္ကဌနှင့် ကော်မတီဝင်များ၊ တိုင်းဒေသကြီး၊ ခရိုင်၊ မြို့နယ်အဆင့် ဌာနဆိုင်ရာတာဝန်ရှိသူများ၊ လူမှုရေးအသင်းအဖွဲ့များ၊ ဖိတ်ကြားထားသူများ တက်ရောက်ကြသည်။