၂၀၁၉ခုနှစ်၊ သြဂုတ်လ ၇ ရက်

 ကျောင်းကျန်းမာရေးသီတင်းပတ် လှုပ်ရှားမှုအခမ်းအနားကို ပြင်ဦးလွင်မြို့ အမှတ်(၁)အခြေခံပညာ အထက်တန်းကျောင်းဧရာဝတီခန်းမတွင် သြဂုတ်လ ၇ ရက် နံနက် ၁၁ နာရီက ကျင်းပရာ တက်ရောက်လာကြသူများက အခမ်းအနားကို နိုင်ငံတော်သီချင်းဖြင့် ဖွင့်လှစ်ပြီး ကျောင်းသား၊ ကျောင်းသူများက ကျောင်းကျန်းမာရေးသီတင်းပတ် လှုပ်ရှားမှုသီချင်းဖြင့် ဖျော်ဖြေသည်။

 ထို့နောက် မန္တလေးတိုင်းဒေသကြီးအစိုးရအဖွဲ့ ဝန်ကြီးချုပ်၏ဇနီး အမျိုးသမီးကော်မတီ နာယက ဒေါက်တာယုယုမေက အဖွင့်အမှာစကားပြောကြားရာတွင် “ကျောင်းကျန်းမာရေး ရက်သတ္တပတ်ကို နှစ်စဉ်နှစ်တိုင်း ကျင်းပမြဲဖြစ်ပြီး ကျောင်းသား၊ ကျောင်းသူများ၏ ပညာရေးသာမက ကျန်းမာရေးကိုပါ အလေးထားသည့် အခမ်းအနားဖြစ်ကြောင်း၊ ကျောင်းသားလူငယ်များကို ပညာသင်ကြားရေးသာမက ကျန်းမာရေး အသိပညာကိုပါပေးနိုင်မည်ဆိုပါက နောင်အနာဂတ်တိုင်းပြည်ကို လွဲပြောင်းပေးရမည့် လူငယ်များသည် ကောင်းမွန်လာမည်ဖြစ်ကြောင်း၊ နိုင်ငံတော်၏ အတိုင်ပင်ခံပုဂ္ဂိုလ်မှ လူငယ်များအတွက် လုပ်ဆောင်ပေးမယ့် အခြေအနေတွေများစွာရှိကြောင်း၊ ထိုအထဲမှ အဓိကကျသည့် ကဏ္ဍ(၇)ခုအနေဖြင့် ကျောင်းကျန်းမာရေးလှုပ်ရှားမှုကို အမျိုးသားရေး အသွင်ဖြင့် ဆောင်ရွက်ရန်၊ မူးယစ်ဆေးဝါးဆန့်ကျင်ရေးနှင့် သုံးစွဲမှုပပျောက်ရေး၊ ဆေးရွက်ကြီးနှင့်တကွ ဆေးလိပ်၊ ကွမ်းယာသုံးစွဲမှုပပျောက်ရေး၊ အရက် အလွန်အကျွံသောက်သုံးခြင်းနှင့် နောက်ဆက်တွဲ အန္တရာယ်လျှော့ချခြင်း၊ ကျန်းမာရေးနှင့် ညီညွတ်သည့် လူနေမှု ဘဝပုံစံများ လိုက်နာကျင့်သုံးရေး၊ ကျောင်းသား၊ ကျောင်းသူများ လမ်းအန္တရာယ်ကင်းရှင်းစေရေး၊ မျိုးဆက်ပွား ကျန်းမာရေးဆိုင်ရာ အသိပညာပေး ထည့်သွင်း သင်ကြားပေးနိုင်ရေး၊ ကျေင်းသား ကျောင်းသူများ ဂိမ်းအလွန်အကျွံ စွဲလမ်းမှုပပျောက်ရေး စသည်တို့ဖြစ်ပြီး ထိုသို့ ဆောင်ရွက်နိုင်ရန်အတွက် မိဘ၊ ဆရာ၊ ကျန်းမာရေးဝန်ထမ်းများ၊ ကျောင်းသား၊ ကျောင်းသူများနှင့် ဌာနဆိုင်ရာများ၏ အကူအညီနှင့် ပိုမိုအောင်မြင်အောင် ဆောင်ရွက်နိ်ုင်မည်ဖြစ်ကြောင်း၊ ကျောင်းကျန်းမာရေး လှုပ်ရှားမှုများတွင် တစ်ကိုယ်ရည်သန့်ရှင်းရေး၊ သွားကျန်းမာရေး၊ စနစ်တကျလက်ဆေးခြင်း၊ အားကစားနည်းများနှင့် ကောင်းမွန်သော လူနေမှုဘဝပုံစံနေထိုင်နိုင်ရေး သင်ကြားပေးနေပြီး ကျောင်းသား၊ ကျောင်းသူများမှ တစ်ဆင့်မိဘများ၊ မိသားစုဝင်များကို မျှဝေမှုများ ပြုလုပ်ပေးနိုင်မည် ဆိုပါက အသိပညာပေးသည့်စနစ် ပိုမိုကျယ်ပြန့်လာမည်ဖြစ်ကြောင်း ပြောကြားသည်။

 ဆက်လက်၍ ပြင်ဦးလွင်ရှိကျောင်းများတွင် ကျောင်းကျန်းမာရေး လှုပ်ရှားမှုများ၌ ကျောင်းသား၊ ကျောင်းသူများကို ကိုယ်တိုင်ပါဝင်ဆောင်ရွက်စေကြောင်း သိရပြီး ထိုအလေ့အကျင့်ကောင်းများကို လုပ်ဆောင်ပေးသည့်အတွက် ကျေးဇူးတင်ရှိကြောင်းနှင့် ကျောင်းသား၊ မိဘ၊ ဆရာ၊ ကျန်းမာရေးဝန်ထမ်းများ၊ ဌာနဆိုင်ရာများ ပူးပေါင်းကာ ကျောင်းကျန်းမာရေးလှုပ်ရှားမှု လုပ်ငန်းများမှသည် အလေ့အကျင့်ကောင်းများကို သယ်ဆောင်ခြင်းဖြင့် လူနေမှု အဆင့်အတန်းမြင့်မားကာ ကျန်းမာပြီး ဉာဏ်ရည်မြင့်မားသည့် နိုင်ငံ့သားကောင်းများ ဖြစ်လာပါစေကြောင်းဖြင့်” အဖွင့်အမှာစကားတွင် ထည့်သွင်းပြောကြား သည်။

 ဆက်လက်၍ ကျောင်းသား၊ ကျောင်းသူလေးများက ပညာပေးပြဇာတ်တို့ဖြင့် ဖျော်ဖြေတင်ဆက်ကြပြီး ပြင်ဦးလွင်မြို့ အထက(၁) ကျောင်းအုပ်ဆရာမကြီး ဒေါက်တာမြတ်စိုးမိုးက ကျောင်းကျန်းမာရေးလှုပ်ရှားမှု ဆောင်ရွက်ချက်များနှင့် ပတ်သက်၍ ရှင်းလင်းပြီး  ကျောင်းသူလေးများက အားကစားပြကွက်ဖြင့် သရုပ်ဖော်ကပြ တင်ဆက်ခဲ့ကြသည်။ အခမ်းအနားအပြီးတွင် အမျိုးသမီးကော်မတီနာယက ဒေါက်တာယုယုမေနှင့် နာယကများ၊ ပြင်ဦးလွင်ခရိုင် အုပ်ချုပ်ရေးမှူးနှင့် တာဝန်ရှိသူများ၊ ခရိုင်ကျန်းမာရေးဦးစီးဌာနမှူးနှင့် ကျန်းမာရေးဝန်ထမ်းများ၊ ခရိုင်ပညာရေးမှူး၊ ကျောင်းအုပ်ဆရာမကြီးနှင့် တာဝန်ရှိသူများ၊ ဆရာ၊ ဆရာမများနှင့် ကျောင်းသားကျောင်းသူများ၊ ဖိတ်ကြားထားသူများ တက်ရောက်ကြသည်။