၂၀၁၇ ခုနှစ်၊ စက်တင်ဘာလ ၄ ရက်

 မန္တလေးတိုင်းဒေသကြီးရဲတပ်ဖွဲ့၏အစီအစဉ်ဖြင့် စဥ့်ကူးမြို့နယ်အတွင်း မှုခင်းကျဆင်းရေးလုပ်ငန်းများနှင့် ယာဉ်စည်းကမ်း၊ လမ်းစည်းကမ်း ထိန်းသိမ်းရေး အသိပညာပေးရေးလုပ်ငန်းများကို မှုခင်းပညာပေးပြခန်းယာဉ်ဖြင့် လှည့်လည်ပညာပေးဟောပြောပြသလျက်ရှိရာ စက်တင်ဘာ ၁ ရက် နံနက် ၈ နာရီက ရွှေပြည်ကျေးရွာသို့ရောက်ရှိပြီး ပညာပေးဟောပြေခြင်းလုပ်ငန်းများ ဆောင်ရွက်ကြသည်။

 အဆိုပါ မှုခင်းပညာပေးပြခန်းယာဉ်သည် ရွှေပြည်ကျေးရွာ အခြေခံပညာအထက်တန်းကျောင်းရှေ့သို့ရောက်ရှိပြီး မြို့နယ်ရဲတပ်ဖွဲ့မှူး ရဲမှူး ဘချစ်က မှုခင်းအသိပညာပေးခြင်းနှင့် ယာဉ်စည်းကမ်း၊ လမ်းစည်းကမ်းများကိုလည်းကောင်း၊ မန္တလေးမြို့ လူကုန်ကူးမှုတားဆီးနှိမ်နင်းရေး ရဲတပ်ဖွဲ့မှ ရဲအုပ်သက်ထွန်းဝင်းက လူကုန်ကူးမှုတားဆီးနှိမ်နင်းရေးလုပ်ငန်းများကိုလည်းကောင်း၊ ပြင်ဦးလွင်မြို့၊ မူးယစ်တပ်စု(၁၆)မှ ရဲအုပ်ဖြိုးဝေကျော်က မူးယစ်ဆေးဝါးသုံးစွဲခြင်း၊ ရောင်းချခြင်းတို့ကြောင့် အသက်အန္တရာယ်ဆုံးရှုံးမှု၊ လူနေမှုဘဝများဆုံးရှုံးရခြင်းနှင့် ဆိုးကျိုးများကိုလည်းကောင်း၊ လက်ပန်လှရဲကင်းစခန်းမှူး ရဲအုပ်ကျော်ခိုင်မိုးက မှုခင်းကျဆင်းရေးအသိပညာပေးခြင်းများကိုလည်းကောင်း ဟောပြောဆောင်ရွက်ကြသည်။

 အဆိုပါ မှုခင်းပညာပေးပြခန်းယာဉ်ဖြင့် ပညာပေးဟောပြောရာသို့ ကျေးရွာတာဝန်ရှိသူများ၊ ရပ်မိ၊ ရပ်ဖများ၊ ဆရာ၊ ဆရာမများနှင့် ကျောင်းသား၊ ကျောင်းသူများ စိတ်ဝင်တစားလာရောက်ကြည့်ရှုလေ့လာကြပြီး ပညာပေးလက်ကမ်းစာစောင်များ ပေးဝေခဲ့ကြသည်။