၂၀၁၆ခုနှစ်၊ နိုဝင်ဘာလ ၂၅ ရက်

 ခြင်ကြောင့်ဖြစ်ပွားတတ်သော သွေးလွန်တုပ်ကွေးရောဂါနှင့် ငှက်ဖျားရောဂါများ မဖြစ်ပွားစေရန်နှင့် ဇီကာဗိုင်းရပ်အန္တရာယ်မှ ကြိုတင်ကာကွယ်နိုင်ရေးအတွက် မန္တလေးမြို့တော်စည်ပင် သာယာရေးကော်မတီသည် တိုင်းဒေသကြီးပြည်သူ့ကျန်းမာရေးဦးစီးဌာနနှင့် ပူးပေါင်းကာ ခြင်နှိမ်နင်းရေး ဖုံး၊ သွန်၊ လဲ၊ စစ် လုပ်ငန်းများ စီမံချက်ချမှတ်၍ မြို့နယ်အလိုက် အကောင် အထည်ဖော်ဆောင်ရွက်လျက်ရှိရာ နိုဝင်ဘာ ၂၅ ရက် နံနက် ၈ နာရီက အောင်မြေသာစံ မြို့နယ်၊ ဘုန်းတော်တိုးရပ်ကွက်၊ အကွက် (၄၁)၊ ဘုန်းတော်တိုး ၁ လမ်းနှင့် ၂ လမ်းကြားတွင် ဖုံး၊ သွန်၊ လဲ၊ စစ် လုပ်ငန်းများ ဆောင်ရွက်ကြသည်။

အဆိုပါ လုပ်ငန်းများဆောင်ရွက်ရာသို့ မန္တလေးမြို့တော်ဝန်၊ စည်ပင်သာယာရေးဝန်ကြီးဌာနဝန်ကြီး ဒေါက်တာ ရဲလွင်နှင့် ဌာနမှူးများ၊ ခရိုင်ပြည်သူ့ ကျန်းမာရေးဦးစီးဌာနမှူး ဒေါက်တာ ကျော်စိုး၊ မြို့နယ်ကျန်းမာရေးမှူးနှင့် ကျန်းမာရေးဝန်ထမ်းများ၊ ငှက်ဖျားတိုက်ဖျက်ရေးဌာနမှ ဝန်ထမ်းများ၊ ရပ်ကွက် အုပ်ချုပ်ရေးမှူးနှင့် အဖွဲ့ဝင်များ၊ အမျိုးသမီးရေးရာအဖွဲ့ဝင်များ၊ မိခင်နှင့်ကလေးစောင့်ရှောက်ရေး အသင်းဝင်များ၊ မြို့တော်စည်ပင်သန့်ရှင်းရေး ဝန်ထမ်းများ တက်ရောက်ကြသည်။

 ရှေးဦးစွာ မြို့တော်ဝန်နှင့် တာဝန်ရှိသူများသည် ဘုန်းတော်တိုးရပ်ကွက်၊ အကွက် (၄၁)အတွင်း လမ်းဘေး ဝဲ၊ ယာ ရေနုတ်မြောင်းများ ရေစီးရေလာ ကောင်းမွန်စေရန် မြို့တော်စည်ပင်သန့်ရှင်းရေးဌာနမှ လုပ်သားများက မြောင်းစာအမှိုက်သရိုက်များ ဆယ်ယူရှင်းလင်းခြင်း၊ သူနာပြုဆရာမများက နေအိမ်များရှိ ရေသိုလှောင်သုံးစွဲသည့် အုတ်ကန်၊ ရေစည်ရေကန်များအတွင်း ပိုးလောက်လမ်းများ မပေါက် ပွားစေရန် Abate ဆေးခပ်ခြင်း၊ ခြင်ထောင် ဆေးစိမ်နည်း လက်တွေ့သရုပ်ပြဆောင်ရွက်ခြင်းနှင့် သက်တမ်းပြည့်သွားပါက ခြင်ထောင်စိမ်ဆေးရည် ကိုယ်တိုင်ဆောင်ရွက်နိုင်ရန် လေ့ကျင့်ပေးခြင်း၊ ကျန်းမာရေးဗဟုသုတ ဆွေးနွေးခြင်း စသည့် ဖုံး၊ သွန်၊ လဲ၊ စစ် လုပ်ငန်းအဆင့်ဆင့်တို့အား လက်တွေ့ ဆောင်ရွက်ပြသခြင်းတို့ကို လှည့်လည်ကြည့်ရှု အားပေးကြသည်။