၂၀၁၇ ခုနှစ်၊ မတ်လ ၁၉ ရက်

မန္တလေးတိုင်းဒေသကြီး စည်ပင်သာယာရေးဝန်ကြီးဌာန ဝန်ကြီး မန္တလေးမြို့တော်ဝန် ဒေါက်တာ ရဲလွင်သည် တိုင်းဒေသကြီးစည်ပင်သာယာရေးအဖွဲ့ ညွှန်ကြားရေးမှူး ဦးမင်းအောင်မြင့်စိုး၊ တာဝန်ရှိသူများနှင့်အတူ မတ် ၁၈ ရက် နံနက် ၉ နာရီက သပိတ်ကျင်းမြို့နယ် စည်ပင်သာယာရေးအဖွဲ့ရုံးသို့ ရောက်ရှိကြရာ အစည်းအဝေးခန်းမ၌ မြို့နယ်စည်ပင်သာယာရေးအဖွဲ့ အမှုဆောင်အရာရှိက ၂၀၁၆-၂၀၁၇ ဘဏ္ဍာရေးနှစ်အတွင်း သပိတ်ကျင်းမြို့နယ် စည်ပင်သာယာရေးအဖွဲ့၏ စည်ပင်သာယာရေး ဆိုင်ရာ လုပ်ငန်းဆောင်ရွက်မှုအခြေအနေများကို ရှင်းလင်းတင်ပြသည်။

 ထိုသို့ တင်ပြရာ၌ မြို့နယ်၏ မြို့ပြ၊ ကျေးလက် လမ်းတံတားတည်ဆောက်ခြင်း၊ ရေပေးဝေရေးလုပ်ငန်းများ တိုးချဲ့ခြင်း၊ အသစ်တည်ဆောက် ခြင်း၊ မွမ်းမံပြင်ဆင်ခြင်း၊ အခွန်အခနှင့် သာမန်ရငွေစာရင်းနှင့် ဘဏ္ဍာငွေ ခွဲဝေသုံးစွဲမှု၊ ဝန်ထမ်းအင်အား အခြေအနေ၊ အမှိုက်သိမ်းဆည်းမှုနှင့် စွန့်ပစ်မှု၊ စက်ယန္တရားအခြေအနေတို့ကိုလည်းကောင်း၊ မြို့နယ်စည်ပင်သာယာရေးကော်မတီဥက္ကဋ္ဌက မြို့ပြသာယာလှပရေး ဆောင်ရွက်ချက်များနှင့် အမှိုက်သိမ်းယာဉ် ထပ်မံဖြည့်ဆည်းဆောင်ရွက်ပေးရေးတို့ကို လည်းကောင်း ဖြည့်စွက်တင်ပြသည်။

 ထို့နောက် တိုင်းဒေသကြီးဝန်ကြီးက စည်ပင်သာယာရေးအဖွဲ့၏ အဓိကလုပ်ငန်းဖြစ်သည့် မြို့ပြသန့်ရှင်းသာယာလှပရေးအတွက် အမှိုက်သိမ်း ဆည်းခြင်းလုပ်ငန်းနှင့် သောက်သုံးရေဖူလုံအောင် ဆောင်ရွက်ခြင်းလုပ်ငန်းများကို လိုအပ်ချက်မရှိအောင် ဆောင်ရွက်ပေးရမည်ဖြစ်ကြောင်း၊ အမှိုက်သိမ်းယာဉ်များလည်း ထပ်မံဖြည့်ဆည်းပေးသွားမည်ဖြစ်ကြောင်း၊ ကောက်ခံရမည့် အခွန်အခများကိုလည်း လျာထားချက် ပြည့်မီကျော်လွန် အောင် ဆောင်ရွက်သွားရမည်ဖြစ်ကြောင်းဖြင့် ပြောကြားသည်။

 ဆက်လက်၍ တိုင်းဒေသကြီးဝန်ကြီးနှင့်အဖွဲ့သည် အောင်စကြာဘုရားလမ်းရှိ မြို့ရေပေးဝေရေး ဂါလန် ၁၅၀၀၀ ဆံ့ ရေကန်အမှတ် (၁)နှင့် ဂါလန် ၃၀၀၀၀ ဆံ့ ရေကန်အမှတ် (၂)တို့ကိုလည်းကောင်း၊ ဂါလန် တစ်သိန်းဆံ့ တိုးချဲ့ရေလှောင်ကန်နှင့် ရေစုပ်စက်၊ ရေတင်စက်များ တပ်ဆင်ပြီးစီးမှုကိုလည်းကောင်း၊ ဆိပ်ကမ်းရပ်ကွက်ရှိ မြို့နယ်စည်ပင်သာယာရေးအဖွဲ့ပိုင် ခန်းမပြုပြင်တည်ဆောက်ရန် အခြေအနေနှင့် ပျိုးခြံ၌ သစ်ပင်များ ပျိုးထောင်ထားရှိမှု ဆိပ်ကမ်းသာပန်းခြံ အခြေအနေတို့ကို လည်းကောင်း လှည့်လည်ကြည့်ရှုစစ်ဆေးသည်။

 ထိုမှတစ်ဆင့် တိုင်းဒေသကြီးဝန်ကြီးနှင့်အဖွဲ့သည်  မိုးကုတ်မြို့သို့ မွန်းလွဲ ၂ နာရီခွဲတွင် ရောက်ရှိကြပြီး ကျပ်ပြင်ရပ်ရှိ မြို့ရေပေးဝေရေး အထောက်အကူပြု ရေထွက်များမှ ရရှိသောရေများကို ရေသိုလှောင်ကန်ဖြင့် ထိန်းသိမ်း၍ ရေဖြန့်ဝေပေးနေမှု အခြေအနေကို ကြည့်ရှုစစ်ဆေးပြီး မြို့နယ်စည်ပင်သာယာရေးအဖွဲ့ရုံး အစည်းအဝေးခန်းမ၌ စည်ပင်သာယာရေးလုပ်ငန်းဆိုင်ရာများကို သက်ဆိုင်ရာကော်မတီအဖွဲ့ဝင်များနှင့် တွေ့ဆုံကာ ဆွေးနွေးပြောကြားသည်။ ထိုသို့တွေ့ဆုံရာ၌ တိုင်းဒေသကြီး လွှတ်တော်ကိုယ်စားလှယ် ဦးစောသောင်းတင်က တက်ရောက်ဆွေးနွေးသည်။

 ရှေးဦးစွာ မြို့နယ်စည်ပင်သာယာရေးအဖွဲ့ အမှုဆောင်အရာရှိက ဝန်ထမ်းအင်အားအခြေအနေ၊ မိုးကုတ်မြို့ပေါ် ရပ်ကွက်ကြီး (၅)ရပ်ကွက်နှင့် ကျပ်ပြင်၊ ကသည်း ရပ်ကွက်များတွင် အမှိုက်သိမ်းလုပ်ငန်းဆောင်ရွက်မှု လမ်းကြောင်းများ၊ လူမှုရေး အဖွဲ့များနှင့် ပူးပေါင်း၍ ရပ်ကွက်အလိုက် သန့်ရှင်းရေး၊ ရေစီးရေလာကောင်းမွန်ရေးလုပ်ငန်းများ ဆောင်ရွက်နေမှု၊ အဖွဲ့ပိုင်ဈေးများအခြေအနေ၊ အခွန်ဌာနစိတ်မှ လုပ်ငန်းဆောင်ရွက်မှုနှင့် လုပ်ငန်းသုံး ယာဉ်စက်ယန္တရားများ အခြေအနေ၊ အမှိုက်သိမ်း ယာဉ်လိုအပ်မှုအခြေအနေနှင့် လိုအပ်သည့် ဝန်ထမ်းများ ခန့်ထားရေး၊ ရငွေနှင့် အသုံးစရိတ် စာရင်းတို့ကို ရှင်းလင်းတင်ပြသည်။

 ထို့နောက် မြို့နယ်စည်ပင်သာယာရေးကော်မတီဥက္ကဋ္ဌက လက်ရှိအသုံးပြုနေသော (၁ ဒသမ ၆၇)ဧကရှိ စည်ပင်သာယာရပ်ကွက်အနီး ဗမွန်ရွာသွားလမ်းဘေးတွင် တည်ရှိသည့် အမှိုက်ကျင်းဟောင်းမှာ လူနေရပ်ကွက်နှင့် နီးကပ်လျက်ရှိနေသဖြင့် ကြေးနီတောင်ရှိ သစ်တော ပလပ်မြေနေရာကို အမှိုက်ကျင်းသစ်အဖြစ် သတ်မှတ်ပေးရန် သဘာဝပတ်ဝန်းကျင်နှင့် ရေဝေရေလဲထိန်းသိမ်းရေးနယ်မြေ၊ အပန်းဖြေနေရာများ ရရှိရေးကို တင်ပြ ဆွေးနွေးသည်။

 တင်ပြချက်များအပေါ် တိုင်းဒေသကြီးဝန်ကြီးက အမှိုက်သိမ်းဆည်းရေးလုပ်ငန်းတွင် ပြည်သူလူထု ပူးပေါင်းပါဝင်ဆောင်ရွက်သည့် အမှိုက်သိမ်း စနစ်ကို အကောင်အထည်ဖော်နေသည့်အတွက် အထူးပင်ကျေနပ်အားရပါကြောင်း၊ လိုအပ်သည့် အမှိုက်သိမ်းယာဉ်နှင့် ဝန်ထမ်းများ ဖြည့်ဆည်း ပေးနိုင်ရေးကိုလည်း ဆောင်ရွက်ပေးမည်ဖြစ်ကြောင်း၊ လုပ်ငန်းများ အောင်မြင်စေရန် သက်ဆိုင်ရာ ဌာနဆိုင်ရာများနှင့် ပေါင်းစပ်ညှိနှိုင်းဆောင်ရွက်သွားကြရန် လိုအပ်ကြောင်း၊ မြို့ရေပေးဝေရေးတွင် လည်း သက်ဆိုင်ရာ ရပ်ကွက်အလိုက် ရေပေးဝေရေးကော်မတီအဖွဲ့များ ဖွဲ့စည်းဆောင်ရွက်မှုများကြောင့် အဆင်ပြေလျက်ရှိသည်ကို တွေ့ရကြောင်းနှင့် လူထု၏ အခွန်အခငွေများဖြင့် မြို့ဖွံ့ဖြိုးတိုးတက်ရေးနှင့် သာယာလှပရေးလုပ်ငန်းများကို ဆောင်ရွက် ရာ၌ ဝန်ဆောင်မှုကောင်းများ ပေးကြရမည်ဖြစ်ကြောင်း စသည်ဖြင့် ပြောကြားသည်။

 ဆက်လက်၍ တိုင်းဒေသကြီးဝန်ကြီးနှင့်အဖွဲ့သည် မိုးကုတ်မြို့ ကြေးစင်တောင်တွင် သဘာဝပတ်ဝန်းကျင်ထိန်းသိမ်းရေး၊ သစ်တောထိန်းသိမ်းရေးနယ်မြေ၊ လူထုအပန်းဖြေစခန်း View Point သုဿာန်နှင့် အမှိုက်စွန့်ပစ်ရန် လျာထားသတ်မှတ်နေရာ များကို လှည့်လည်ကြည့်ရှုစစ်ဆေးပြီး တာဝန်ရှိသူများအား လိုအပ်သည်များ ဖြည့်စွက်မှာကြားခဲ့သည်။