၂၀၁၇ခုနှစ်၊ သြဂုတ်လ ၉ ရက်

 မန္တလေးမြို့တော်စည်ပင်သာယာရေးကော်မတီနယ်နိမိတ်အတွင်း ဆက်သွယ်ရေးဝန်ဆောင်မှုလုပ်ငန်း ခွင့်ပြုချက်ရရှိသူများနှင့် မန္တလေးမြို့တော်စည်ပင် သာယာရေးကော်မတီတို့အကြား Right of Way ဆိုင်ရာ သဘောတူညီမှုစာချုပ် ချုပ်ဆိုပွဲအခမ်းအနားကို သြဂုတ်လ ၉ ရက် မွန်းလွဲ ၁ နာရီက မန္တလေး မြို့တော်စည်ပင်သာယာရေးကော်မတီ ခြောက်ထပ်ဆောင်အစည်းအဝေးခန်းမ၌ ကျင်းပရာ မန္တလေးမြို့တော်ဝန် စည်ပင်သာယာရေးဝန်ကြီးဌာန ဝန်ကြီး ဒေါက်တာရဲလွင် တက်ရောက်အမှာစကားပြောကြားသည်။

 အခမ်းအနားသို့ မန္တလေးမြို့တော်စည်ပင်သာယာရေးကော်မတီ ဒုတိယမြို့တော်ဝန် ဦးရဲမွန်၊ အတွင်းရေးမှူး ဦးအောင်ကျော်ထွန်း၊ တွဲဖက်အတွင်းရေးမှူး၊ ကော်မတီဝင်များနှင့် ဌာနမှူးများ၊ Elite Telecom Public Co.,Ltd၊ Global Technology Co.,Ltd၊ Myanmar Board band Telecom Co.,Ltd၊ Myanmar Speed Net Co.,Ltd၊ Omini Focus Co.,Ltd၊ Ocean Wave Communication Group Co.,Ltd၊ Yatanarpon Teleport Public Co.,Ltd တို့မှ တာဝန်ရှိသူများ တက်ရောက်ကြသည်။

 ရှေးဦးစွာ မြို့တော်ဝန်က အဖွင့်အမှာစကားပြောကြားရာတွင် “မန္တလေးမြို့တော်စည်ပင်သာယာရေးကော်မတီသည် Clean City၊ Green City၊ Smart City၊ Sustainable City တို့ကို အဆင့်ဆင့်ဆောင်ရွက်လျက်ရှိပါကြောင်း၊ ယခုအခါ Smart City ကို အကောင်အထည်ဖော်ဆောင်ရွက်လျက်ရှိရာမှာ Internet မပါဘဲ သွားလို့မရပါကြောင်း၊ ထို့ကြောင့် ပထမဆုံးအဆင့်အနေဖြင့် ခြေလှမ်းခြင်းဖြစ်ပါကြောင်း၊ အဆိုပါအခြေခံအဆောက်အအုံများ ဆောင်ရွက်မည့် ကုမ္ပဏီများကို တိုင်ပင်ပြီး သဘောတူညီမှုရရှိခဲ့သည့်အတွက် ယနေ့အခမ်းအနားကို ဆောင်ရွက်ခြင်းဖြစ်ပါကြောင်း”ပြောကြားသည်။

 ထို့နောက် မန္တလေးမြို့တော်စည်ပင်သာယာရေးကော်မတီနှင့် ဆက်သွယ်ရေးဝန်ဆောင်မှုလုပ်ငန်းများအတွက် Right of Way ဆိုင်ရာ သဘောတူညီမှု စာချုပ် ချုပ်ဆိုကြရာ မန္တလေးမြို့တော်စည်ပင်သာယာရေးကော်မတီ တွဲဖက်အတွင်းရေးမှူး ဦးသက်နိုင်ထွန်း၊ လမ်းတံတားဌာန ဌာနမှူး ဦးမျိုးအောင် တို့နှင့် ကုမ္ပဏီ ခုနစ်ခုတို့မှ တာဝန်ရှိသူများသည် မြို့တော်ဝန်ရှေ့မှောက်တွင် လက်မှတ်ရေးထိုးကြပြီး အပြန်အလှန် လဲလှယ်ကာ မှတ်တမ်းဓာတ်ပုံ ရိုက်ကူးကြသည်။

 မန္တလေးမြို့တော်စည်ပင်သာယာရေးကော်မတီ၏ ရပိုင်ခွင့်နည်းလမ်း Right of Way အရ ကော်မတီနယ်နိမိတ်အတွင်း မြေပေါ်၊ မြေအောက် ဆက်သွယ် ဆောင်ရွက်ပါက ယခုသဘောတူညီမှုလက်မှတ်ရေးထိုးထားသော ကုမ္ပဏီ ခုနစ်ခုသာ လုပ်ငန်းဆောင်ရွက်ခွင့်ရှိသည်။