၂၀၁၇ ခုနှစ် စက်တင်ဘာလ ၆ ရက်

 မန္တလေးမြို့တော်ဝန်၊ စည်ပင်သာယာရေးဝန်ကြီးဌာန ဝန်ကြီး ဒေါက်တာရဲလွင်သည် မန္တလေးမြို့တော်စည်ပင်သာယာရေးကော်မတီ ဒုတိယမြို့တော်ဝန် ဦးရဲမွန်၊ ကော်မတီဝင်များ၊ ဌာနမှူးများနှင့် တာဝန်ရှိသူများလိုက်ပါလျက် စက်တင်ဘာလ ၆ ရက် နံနက် ၈ နာရီခွဲက မန္တလေးမြို့တော်စည်ပင်သာယာရေး ကော်မတီမှ ဆောင်ရွက်လျက်ရှိသည့် ဖွံ့ဖြိုးတိုးတက်ရေးလုပ်ငန်းများကို ကွင်းဆင်းစစ်ဆေးသည်။

 ရှေးဦးစွာ မြို့တော်ဝန်နှင့်တာဝန်ရှိသူများသည် ချမ်းအေးသာစံမြို့နယ်၊ ၂၇ လမ်းအား ၇၈ လမ်းမှ ၇၉ လမ်းအထိ လမ်းဖောက်လုပ်နိုင်ရေး မြေပြင်ကွင်းဆင်းဆောင်ရွက်ရာ လမ်းတံတားဌာန၊ ဌာနမှူးနှင့် အင်ဂျင်နီယာများ၊ မြို့ပြစီမံကိန်းနှင့် မြေစီမံခန့်ခွဲမှုဌာန ဌာနမှူးနှင့် တာဝန်ရှိသူများက လမ်းသားအကျယ်ရရှိနိုင်မှုနှင့် မြေတိုင်းတာမှုအခြေအနေများကို ရှင်းလင်းတင်ပြရာ မြို့တော်ဝန်နှင့်တာဝန်ရှိသူများက လှည့်လည်ကြည့်ရှုစစ်ဆေးသည်။

 ထို့နောက် မြို့တော်ဝန်နှင့်တာဝန်ရှိသူများသည် အောင်မြေသာစံမြို့နယ်၊ နန်းရှေ့ရေစစ်ကန်အနီး အမှတ်(၄)ရေတွန်းစက်ရုံရှိ အကြမ်းရေစစ်ကန်မှ တစ်ဆင့် ရေတင်ပန့်သုံးစုံဖြင့် ရေသန့်စင်ကန်ပေါ်သို့ တင်ပေးပြီး ach (Aluminium Chloro Hydrate)ဆေးခပ်ပြီး Flocculator Tank အတွင်း အနည်များကို စုဝေးစေပြီး အနည်ခဲများကို Sendimantation Tank တွင် အနည်ထိုင်စေ၍ ရေကို Rapaid Sand Filter ဖြင့် ထပ်မံစစ်ပြီး ဂါလန် ငါးသိန်းဆံ့ ရေလှောင်ကန်အတွင်း သိုလှောင်ကာ ကလိုရင်းဆေးခပ်ပြီး ရေတွန်းစက်များဖြင့် ရပ်ကွက်များသို့ အလှည့်ကျမောင်းနှင်ဖြန့်ဝေပေးနေမှု အခြေအနေများကို ရေနှင့်သန့်ရှင်းမှုဌာန ဌာနမှူး ဦးမျိုးသန့်က ရှင်းလင်းတင်ပြရာ မြို့တော်ဝန်က လှည့်လည်ကြည့်ရှုစစ်ဆေးသည်။

 အမှတ်(၄) ရေတွန်းစက်ရုံမှ အောင်မြေသာစံမြို့နယ်အတွင်းရှိ အနှိပ်တော်ရပ်ကွက်၊ မဟာဇေယျာဘုံရပ်ကွက်၊ ချမ်းအေးသာစံမြို့နယ်အတွင်းရှိ ပြည်ကြီးမျက်ရှင်ရပ်ကွက်၊ နဂါးရပ်ကွက်၊ ယာဉ်ပျံရပ်ကွက်၊ ကျန်းမာရေးရပ်ကွက်များသို့လည်းကောင်း၊ အမှတ်(၃)ရေတွန်းစက်ရုံသို့ ပေးပို့ပြီး ထိုမှတစ်ဆင့် မဟာအောင်မြေမြို့နယ်ရှိ ရဲမွန်တောင်ရပ်ကွက်များသို့ နေ့စဉ် ရေဂါလန်ငါးသန်းခန့် ဖြန့်ဖြူးပေးလျက်ရှိသည်။