၂၀၁၇ခုနှစ် အောက်တိုဘာ ၁၀ ရက်

 မန္တလေးမြို့တော်စည်ပင်သာယာရေးကော်မတီနှင့် m. Development Corporation(Myanmar)Co.,Ltd တို့အကြား ချမ်းမြရွှေပြည်ခရီးသည်တင် ယာဉ်ရပ်နားစခန်းအဆင့်မြှင့်တင် တည်ဆောက်ခြင်းလုပ်ငန်း သဘောတူစာချုပ် လက်မှတ်ရေးထိုးပွဲ အခမ်းအနားကို အောက်တိုဘာလ ၁၀ ရက် မွန်းလွဲ ၃ နာရီက မန္တလေးမြို့တော်စည်ပင်သာယာရေးကော်မတီရုံး အစည်းအဝေးခန်းမ၌ ကျင်းပရာ မြို့တော်ဝန် စည်ပင်သာယာရေးဝန်ကြီး ဒေါက်တာရဲလွင် တက်ရောက် အဖွင့်အမှာစကားပြောကြားသည်။

အခမ်းအနားသို့ မန္တလေးမြို့တော်စည်ပင်သာယာရေးကော်မတီ ဒုတိယဥက္ကဋ္ဌ ဒုတိယမြို့တော်ဝန် ဦးရဲမွန်၊ အတွင်းရေးမှူး ဦးအောင်ကျော်ထွန်း၊ တွဲဖက်အတွင်းရေးမှူးနှင့်ကော်မတီဝင်များ၊ ဌာနမှူးများ၊ တာဝန်ယူတည်ဆောက်မည့် m. Development Corporation(Myanmar)Co.,Ltd မန်နေဂျင်း ဒါရိုက်တာ ဦးသောင်းထိုက်မင်းနှင့်တာဝန်ရှိသူများ တက်ရောက်ကြသည်။

 ရှေးဦးစွာ မြို့တော်ဝန်ဒေါက်တာရဲလွင်က အဖွင့်အမှာစကားပြောကြားရာ၌ မန္တလေးမြို့တော်အင်္ဂါနှင့်အညီ နိုင်ငံတကာအဆင့်မီ ကားကြီးဝင်း တည်ဆောက်သွားမည်ဖြစ်၍ တာဝန်ယူဆောင်ရွက်သွားမည့် ကုမ္ပဏီအနေဖြင့် သတ်မှတ်ချိန်ကာလအတွင်း အရည်အသွေး၊ စံချိန်စံညွှန်းပြည့်မီ အောင် ဆောင်ရွက်သွားမည်ဟု ယုံကြည်ပါကြောင်း၊ ကားကြီးဝင်းများကို ခေတ်ကာလနှင့်လျော်ညီအောင် ဆောင်ရွက်ခြင်းသည် မန္တလေးမြို့တော် စည်ပင်သာယာရေးကော်မတီ လုပ်ဆောင်ရမည့် တာဝန်တစ်ရပ်လည်းဖြစ်ကြောင်း၊ ယခင်က ကားဝင်းများ၌ ပြဿနာပေါင်းစုံရှိခဲ့ပါကြောင်း၊ ကော်မတီမှတာဝန်ယူ၍ ရှင်းလင်းဆောင်ရွက်ပေးခဲ့ရာတွင် မန္တလေးမြို့တော်စည်ပင်သာယာရေးကော်မတီဝင်များက အနီးကပ် ကြီးကြပ်ညှိနှိုင်း ဆောင်ရွက်ခြင်းနှင့် လုံခြုံရေးအတွက် စည်ပင်သာယာရဲတပ်ဖွဲ့နှင့် ဌာနဝန်ထမ်းများ ပူးပေါင်းဆောင်ရွက်ပေးလျက်ရှိကြောင်း၊ အဆင့်မြင့်ကားကြီးဝင်း တည်ဆောက်ပြီးစီးပါက မြို့တော်ဖွံ့ဖြိုးရေးကို တစ်ဖက်တစ်လမ်းက အထောက်အကူဖြစ်လာမှာဖြစ်သည့်အတွက် အမြန်ဆုံးအကောင်အထည်ဖော် ဆောင်ရွက်ရမည်ဖြစ်ကြောင်း၊ အခက်အခဲများကို မိမိတို့ကော်မတီဝင်များမှ အကောင်းဆုံးနည်းလမ်းများဖြင့် ကူညီပေးသွားမှာဖြစ်ကြောင်း စသည်ဖြင့် ပြောကြားသည်။

 ဆက်လက်၍ မန္တလေးမြို့တော်စည်ပင်သာယာရေးကော်မတီ တွဲဖက်အတွင်းရေးမှူး ဦးသက်နိုင်ထွန်းနှင့် m. Development Corporation (Myanmar) Co.,Ltd မန်နေဂျင်း ဒါရိုက်တာ ဦးသောင်းထိုက်မင်းတို့က ချမ်းမြရွှေပြည်ခရီးသည်တင်ယာဉ်ရပ်နားစခန်းအဆင့်မြှင့်တင် တည်ဆောက် ခြင်းလုပ်ငန်း သဘောတူစာချုပ်များကို လက်မှတ်ရေးထိုးကြပြီးနောက် စာချုပ်များအပြန်အလှန် လဲလှယ်ကြသည်။

 ထို့နောက် မန်နေဂျင်း ဒါရိုက်တာ ဦးသောင်းထိုက်မင်းက ကျေးဇူးတင်စကားပြောကြားပြီးနောက် မြို့တော်ဝန်နှင့်တာဝန်ရှိသူများသည် အမှတ်တရ စုပေါင်းမှတ်တမ်းတင်ဓာတ်ပုံရိုက်ကြသည်။

 အဆိုပါ ချမ်းမြရွှေပြည်ခရီးသည်တင်ယာဉ်နားစခန်းကို ၂၀၂၀ ခုနှစ်တွင် အပြီးတည်ဆောက်သွားမည်ဖြစ်ပြီး ကုမ္ပဏီ၏ ရင်းနှီးမြှုပ်နှံငွေ အမေရိကန် ဒေါ်လာသန်း ၁၅၀ ဖြင့် နိုင်ငံတကာအဆင့်မီ ကားဝင်းအဖြစ် တည်ဆောက်သွားမည်ဖြစ်သည်။