၂၀၁၇ ခုနှစ် နိုဝင်ဘာ ၁၃ ရက်

 မြို့နယ်စည်ပင်သာယာရေးအဖွဲ့များအနေဖြင့် ဝန်ကြီးဌာန၏ ညွှန်ကြားချက်နှင့်အညီ ဒေသအာဏာပိုင်အဖွဲ့အစည်းများ၊ မြို့နယ်ဖွံ့ဖြိုးတိုးတက်မှု အထောက်အကူပြုကော်မတီများ၏ အနီးကပ်ကြီးကြပ်မှုဖြင့် ကြိုးပမ်းဆောင်ရွက်လျက်ရှိသည်ကို တွေ့မြင်ရသည့်အတွက် အထူးပင် ကျေးဇူးတင်ရှိ ပါကြောင်း၊ မိမိတို့မြို့နယ် ဖွံ့ဖြိုးတိုးတက်ရေးအတွက် လမ်း၊ တံတား၊ ရေပေးရေး၊ သန့်ရှင်းသာယာလှပရေး၊ စိမ်းလန်းစိုပြည်ရေး၊ မြို့တွင်း ရေစီးရေလာ ကောင်းမွန်ရေးလုပ်ငန်းများကို ပြည်သူထံမှ ကောက်ခံရရှိသည့် အခွန်အခများဖြင့် ဆောင်ရွက်ရခြင်းဖြစ်၍ စည်ပင်သာယာရေးဆိုင်ရာ လုပ်ငန်းများကို ပြည်သူများအတွက် ဝန်ဆောင်မှုကောင်းများ ပေးနိုင်ရမည်ဖြစ်ကြောင်း၊ ၂၀၁၇-၂၀၁၈ ဘဏ္ဍာရေးနှစ်အတွင်း အခွန်နှင့် သာမန်ရငွေများကို ပြည့်ပြည့် ဝဝနှင့် ပိုမိုတိုးတက်ရရှိအောင် စည်ပင်သာယာရေးအဖွဲ့ ဥပဒေများနှင့်အညီ ကောက်ခံသွားကြရမည့်အပြင် ရသင့်ရထိုက်သည့် အခွန်အခများကိုလည်း ရရှိအောင် ဆောင်ရွက်ကြရမည်ဖြစ်ကြောင်း၊ လုပ်ငန်းများ ဆောင်ရွက်ရာတွင် အခက်အခဲများစွာရှိသော်လည်း မိမိတို့မြို့နယ်ဖွံ့ဖြိုးတိုးတက်ရေးအတွက် အတတ်နိုင်ဆုံး ကြိုးစားကြရမည်ဖြစ်ကြောင်း စသည်ဖြင့် တိုင်းဒေသကြီးအစိုးရအဖွဲ့ဝင် စည်ပင်သာယာရေးဝန်ကြီးဌာန ဝန်ကြီး မန္တလေးမြို့တော်ဝန် ဒေါက်တာ ရဲလွင်က နိုဝင်ဘာ ၁၂ ရက်တွင် မိတ္ထီလာမြို့နယ်နှင့် မလှိုင်မြို့နယ်တို့မှ စည်ပင်သာယာရေးကော်မတီဝင်များနှင့် တွေ့ဆုံရာ၌ ပြောကြားသည်။

 ထိုသို့ တွေ့ဆုံရာ၌ သက်ဆိုင်ရာ မြို့နယ်စည်ပင်သာယာအမှုဆောင်အရာရှိများက မိမိမြို့နယ်များ၏ ပထဝီအနေအထား အချက်အလက်များ၊ ဝန်ထမ်း ခန့်ထားမှု၊ အခွန်နှင့် သာမန်ရငွေများ ကောက်ခံရရှိမှု၊ သာမန်နှင့် ငွေလုံးငွေရင်းသုံးစွဲမှု၊ အခွင့်အရေး လိုင်စင်များ လေလံရောင်းချမှု၊ အဖွဲ့ပိုင်မြေများ ဂရန် ရရှိရေး ဆောင်ရွက်ထားရှိမှု၊ ၂၀၁၇-၂၀၁၈ ဘဏ္ဍာရေးနှစ်အတွင်း ဆောင်ရွက်နေသည့် လမ်း၊ တံတား၊ ရေပေးရေးနှင့် သန့်ရှင်းရေးလုပ်ငန်းများ အခြေအနေကို ပါဝါပွိုင့်ဖြင့် အသီးသီး ရှင်းလင်းတင်ပြကြပြီး မြို့နယ်စည်ပင်သာယာရေးကော်မတီ ဥက္ကဋ္ဌများက ပြည်သူများ၏ တင်ပြချက်အပေါ် ဆောင်ရွက်ပေးနိုင်မှု၊ အမှိုက်သိမ်းဆည်းမှုနှင့် စွန့်ပစ်မှုစနစ်များ၊ လုပ်ငန်းသုံးယာဉ်ယန္တရားများ အခြေအနေနှင့် ဒေသတွင်း ဆောင်ရွက်ပေးရမည့် လိုအပ်ချက်များကို ဖြည့်ဆည်းတင်ပြကြရာ တိုင်းဒေသကြီးဝန်ကြီးက လုပ်ငန်းကဏ္ဍအလိုက် ပေါင်းစပ်ညှိနှိုင်းဆောင်ရွက်ပေးသည်။

 ဆက်လက်၍ တိုင်းဒေသကြီးဝန်ကြီး ဒေါက်တာရဲလွင်သည် တိုင်းဒေသကြီး စည်ပင်သာယာရေးအဖွဲ့ ညွှန်ကြားရေးမှူး ဦးမင်းအောင်မြင့်စိုး၊ ဒုတိယ အင်ဂျင်နီယာမှူးကြီး ဦးဝင်းမြင့်တို့နှင့်အတူ နိုဝင်ဘာ ၁၂ ရက် နံနက် ၁၀ နာရီခွဲတွင် မိတ္ထီလာမြို့ပေါက်ချောင်းလမ်းမကြီး ရေဆိုးကန်နှင့် မိတ္ထီလာ (တောင်)ကန်အကြား၌ အရှည်ပေ ၁၉၀၀၊ အကျယ် ၁၆ ပေ၊ အမြင့် ၈ လက်မရှိ ကွန်ကရစ်လမ်းခင်းခြင်း လုပ်ငန်းခွင်သို့ ရောက်ရှိစစ်ဆေးရာ မြို့နယ် စည်ပင်သာယာရေးကော်မတီဥက္ကဋ္ဌ ဒေါ်နီလာဝင်း၊ အမှုဆောင်အရာရှိ ဒုတိယညွှန်ကြားရေးမှူး ဦးသန့်ဇင်နှင့် တာဝန်ယူဆောင်ရွက်ကြသည့် ကုမ္ပဏီမှ တာဝန်ရှိသူများက လုပ်ငန်းဆိုင်ရာများကို ရှင်းလင်းတင်ပြကြပြီး တိုင်းဒေသကြီးဝန်ကြီးက သတ်မှတ်စံချိန်စံညွှန်း၊ အရည်အသွေးပြည့်မီအောင် ဆောင်ရွက်သွားရန် မှာကြားသည်။ ဆက်လက်၍ မိတ္ထီလာမြို့ ပြည်သာယာ (၅)လမ်းကို အရှည်ပေ ၁၀၀၀၊ အကျယ် ၁၂ ပေ၊ ကတ္တရာလမ်း ခင်းခြင်း လုပ်ငန်းခွင်သို့လည်းကောင်း၊ ရန်မျိုးအောင် တိုးချဲ့ရေပေးရေးလုပ်ငန်းဖြစ်သည့် ဂါလန် ငါးသောင်းဆံ့ မြေစိုက် ရေလှောင်ကန် အလျားပေ ၄၀၊ အနံ ၂၅ ပေ၊ အမြင့် ၉ ပေ အုတ်ရေကန် တည်ဆောက်ပြီးစီးမှုကိုလည်းကောင်း၊ အောင်ဇေယျာရပ်ကွက်၊ ကိုးနဝင်းကျောင်းရှေ့ မြေသားလမ်းကို အရှည်ပေ ၁၂၀၀ ၊ အကျယ် ၁၂ ပေရှိ ကတ္တရာလမ်းအဖြစ် အဆင့်မြှင့်တင်ခင်းခြင်းလုပ်ငန်းများကို လှည့်လည်ကြည့်ရှုစစ်ဆေးသည်။

 ထိုမှတစ်ဆင့် တိုင်းဒေသကြီးဝန်ကြီးနှင့် အဖွဲ့သည် မွန်းတည့် ၁၂ နာရီတွင် မလှိုင်မြို့နယ် စည်ပင်သာယာရေးအဖွဲ့ရုံးခန်းမ၌ မြို့နယ်စည်ပင်သာယာရေး ကော်မတီဥက္ကဋ္ဌ ဦးမြသန်းနှင့် ကော်မတီဝင်များ၊ အမှုဆောင်အရာရှိ ဒုတိယညွှန်ကြားရေးမှူး ဦးခင်မောင်ထွေးနှင့် ဝန်ထမ်းများအား တွေ့ဆုံ၍ စည်ပင်သာယာရေးဆိုင်ရာလုပ်ငန်းများကို မှာကြားပြီး မွန်းလွဲ ၁ နာရီတွင် မလှိုင်မြို့နယ် ထန်းတော-မုန်ပင်လေး လမ်းပိုင်းအရှည်ပေ ၆၈၀ ၊ အကျယ် ၁၂ ပေရှိ ကတ္တရာလမ်း အဆင့်မြှင့်တင်ခင်းခြင်း လုပ်ငန်းခွင်ကို ကြည့်ရှုစစ်ဆေးကာ တာဝန်ရှိသူများအား လုပ်ငန်းလိုအပ်ချက်များ ဖြည့်စွက်မှာကြားခဲ့သည်။