၂၀၁၅ခုနှစ်၊ သြဂုတ်လ ၂၅ ရက်

 မန္တလေးတိုင်းဒေသကြီးအစိုးရအဖွဲ့၏ ဂုဏ်ပြုချီးမြှင့်မှုဖြင့် မန္တလေးမြို့ မြို့မတူရိယာအသင်း ကြီး၏ နှစ်(၉၀)ပြည့် ရင်ထဲက မန္တလေးမြို့မ သီချင်းအဆို ပြိုင်ပွဲကြီးကို စက်တင်ဘာ ၄ရက်တွင် ကျင်းပမည်ဖြစ်ရာ ပြိုင်ပွဲဝင်ရောက်ရန် လျှောက်ထားသူ ၂၅၃ဦးအား အသံစစ်ဆေးအကဲဖြတ် ယှဉ်ပြိုင်ခြင်းများကို ယနေ့နံနက်ပိုင်းမှစတင်၍ မန္တလေးမြို့ရှိ အမျိုးသားဇာတ်ရုံကြီးနှင့် လေ့ကျင့်ရေးရုံများတွင် (A)၊(B)၊(C) အုပ်စုများခွဲကာ ဝါသနာရှင်များ၏ အသံစစ်ဆေးယှဉ်ပြိုင်ခြင်း များကို မန္တလေးတိုင်းဒေသကြီးအစိုးရအဖွဲ့ ဘဏ္ဍာရေးဝန်ကြီးဌာနဝန်ကြီး ဒေါက်တာမြင့်ကြူက ကြည့်ရှုအားပေးသည်။

 အသံစစ်ဆေးအကဲဖြတ်ခြင်းများအနေဖြင့် (A)အုပ်စုမှ ပြိုင်ပွဲဝင် ၅၀ဦး၊ (B)အုပ်စုမှ ပြိုင်ပွဲဝင် ၅၀ဦးနှင့် (C)အုပ်စုမှ ပြိုင်ပွဲဝင် ၅၀ဦး ယှဉ်ပြိုင်ခဲ့ပြီး ဂီတစာဆိုအနုပညာရှင်ကြီးများက အကဲဖြတ်အမှတ်ပေးခြင်းများ ဆောင်ရွက်ခဲ့ကြသည်။                  

 အသံစစ်ဆေးအကဲဖြတ်ခြင်းများကို မန္တလေးမြို့ အမျိုးသားဇာတ်ရုံကြီးတွင် ကျင်းပလျက်ရှိရာ မည်သူမဆို အခမဲ့လာရောက်ကြည့်ရှုနိုင်ပြီး ဆန်ခါတင်ပြိုင်ပွဲဝင်များအား စက်တင်ဘာ ၄ရက်၊ ၅ရက်နှင့် ၆ရက်များတွင် နိုင်ငံတော်သံစုံတီးဝိုင်းကြီးများဖြင့် တီးခတ်ဂုဏ်ပြု၍ အဆင့်လိုက် ဆုများ ချီးမြှင့်မည်ဖြစ်သည်။ ထို့ပြင် ပြိုင်ပွဲကျင်းပမှုများနှင့် နိုင်ငံကျော်အဆိုတော်များ၏ ဖျော်ဖြေမှု များကိုလည်း ရုပ်သံလိုင်းများမှ တိုက်ရိုက်ထုတ်လွှင့်သွားမည်ဖြစ်သည်။