၂၀၁၇ ခုနှစ်၊ ဇူလိုင်လ ၂၆ ရက်

 မန္တလေးတိုင်းဒေသကြီးအတွင်းရှိ အရပ်ဘက်ဆိုင်ရာအဖွဲ့အစည်းများအတွက် အားလုံးလွှမ်းခြုံနိုင်သောကျန်းမာရေးစောင့်ရှောက်မှု (Universal Health Coverage) နှင့် အမျိုးသားကျန်းမာရေးစီမံကိန်း (၂၀၁၇-၂၀၂၁)(National Health Plan 2017-2021) ဖိုရမ်ဆွေးနွေးပွဲကို ဇူလိုင်လ ၂၆ ရက် နံနက် ၈ နာရီက မန္တလေးမြို့ရှိ Hotel Hazel Mandalay တွင် ကျင်းပရာ တိုင်းဒေသကြီးအတွင်းရှိ အရပ်ဘက်အဖွဲ့အစည်းအသီးသီးမှ ကိုယ်စားလှယ်များ၊ ဖိတ်ကြားထားသူများ တက်ရောက်ဆွေးနွေးကြသည်။

 အားလုံးလွှမ်းခြုံနိုင်သော ကျန်းမာရေးစောင့်ရှောက်မှုကို နားလည်စေရန် ကျန်းမာရေးနှင့်အားကစားဝန်ကြီးဌာနမှ အကောင်အထည်ဖော်ဆောင်ရွက် နေသော အမျိုးသားကျန်းမာရေးစီမံကိန်း(၂၀၁၇-၂၀၂၁)ကို သဘောပေါက်စေရန်၊ အမျိုးသားကျန်းမာရေးစီမံကိန်း(၂၀၁၇-၂၀၂၁)တွင် အရပ်ဘက် ဆိုင်ရာအဖွဲ့အစည်းများမှ မည်သည့်ကဏ္ဍမှပါဝင်နိုင်မည်ကို ဆွေးနွေးရန်၊ အရပ်ဘက်ဆိုင်ရာအဖွဲ့အစည်းများမှ ရှေ့ဆက်ဆောင်ရွက်နိုင်မည့်လုပ်ငန်း များကို ဆွေးနွေးရန် ရည်ရွယ်ချက်များဖြင့် ဖိုရမ်ကို ကျင်းပခြင်းဖြစ်သည်။

 ဖိုရမ်ဆွေးနွေးပွဲသို့ မန္တလေးတိုင်းဒေသကြီးအစိုးရအဖွဲ့ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဝန်ကြီး ဒေါက်တာစိုးသန်း၊ မန္တလေးတိုင်း ဒေသကြီး ကျန်းမာရေးဦးစီးဌာန ဦးစီးမှူး ဒေါက်တာသန်းသန်းမြင့်၊ ဗြဟ္မစိုရ်လူမှုကူညီရေးအသင်း(မန္တလေး)နှင့် National NGO Network (မန္တလေးတိုင်း ဒေသကြီး)ဥက္ကဋ္ဌ ဒေါက်တာသန်းထွန်းမြင့်တို့က ဖိုရမ်နှင့်ပတ်သက်၍ အဖွင့်အမှာစကားများပြောကြားခဲ့သည်။

 ကျန်းမာရေးနှင့် အားကစားဝန်ကြီးဌာနမှ အမျိုးသားကျန်းမာရေးစီမံကိန်း(၂၀၁၇-၂၀၂၁)ကို အရှိန်အဟုန်ဖြင့်ကြိုးပမ်းဆောင်ရွက်ရာတွင် အရပ်ဘက် ဆိုင်ရာအဖွဲ့အစည်းများ၏ အခန်းကဏ္ဍကိုသေချာစွာစဉ်းစားလျက် အရပ်ဘက်ဆိုင်ရာအဖွဲ့အစည်းများမှ ပါဝင်ဆောင်ရွက်ရန် အားပေးလျက်ရှိသည်။

 ဆွေးနွေးပွဲတွင် ဒေါက်တာသန်းထွန်းစိန်က မြန်မာနိုင်ငံတွင် ကျန်းမာရေးမျှတမှု ပိုမိုရရှိစေရန် အရပ်ဘက်အဖွဲ့အစည်းများ ပါဝင်ရမည့် အခန်းကဏ္ဍ၊ မြန်မာနိုင်ငံတွင် ကျန်းမာရေးစောင့်ရှောက်မှုရှိစေရေးအတွက် စိန်ခေါ်နေမှုများ၊ မြန်မာနိုင်ငံတွင် ကျန်းမာရေးမျှတမှုရှိစေရေးအတွက် လူတိုင်းလက်လှမ်းမီ သည့် ကျန်းမာရေးစောင့်ရှောက်မှုများနှင့် ပတ်သက်၍လည်းကောင်း၊ ဒေါက်တာစည်သူရက အားလုံးလွှမ်းခြုံနိုင်သော ကျန်းမာရေးစောင့်ရှောက်မှုများနှင့် ပတ်သက်၍လည်းကောင်း၊ ဒေါ်ဇင်နွယ်ဝင်းက အရပ်ဘက်ဆိုင်ရာအဖွဲ့အစည်းများ၏ အားလုံးလွှမ်းခြုံနိုင်သော ကျန်းမာရေးစောင့်ရှောက်မှုအတွက် ကြိုးပမ်းဆောင်ရွက်မှုနှင့်ပတ်သက်၍လည်းကောင်း၊ ဒေါက်တာရဲမင်းထွေးက အမျိုးသားကျန်းမာရေးစောင့်ရှောက်မှုစီမံကိန်း(၂၀၁၇-၂၀၂၁)နှင့် ပတ်သက်၍လည်းကောင်း ဆွေးနွေးကြသည်။

 ပြည်ကြီးခင်အဖွဲ့သည် ကျန်းမာရေးဝန်ကြီးဌာနနှင့် လူမှုဝန်ထမ်းနှင့်ပြန်လည်နေရာချထားရေးဝန်ကြီးဌာနတို့နှင့်ပူးပေါင်း၍ ၁၉၉၇ ခုနှစ်မှ စတင် ဆောင်ရွက်လျက်ရှိပြီး အရပ်ဘက်လူမှုအဖွဲ့အစည်းများအား လူအခွင့်အရေးစွမ်းရည်မြှင့်တင်ပေးခြင်းလုပ်ငန်းများ၊ အသင်းအဖွဲ့မှတ်ပုံတင်ခြင်းဆိုင်ရာ နည်းဥပဒေနှင့် သတင်းအချက်အလက်ရရှိခွင့် မျြင့်တင်ပေးရေးလုပ်ငန်းများဆောင်ရွက်လျက်ရှိသည်။

 တိုင်းဒေသကြီး၊ ပြည်နယ်အဆင့်တို့တွင် ကျန်းမာရေးလုပ်ဆောင်နေရသော အရပ်ဘက်အဖွဲ့အစည်းများနှင့်အတူ UHC နှင့်ပတ်သက်သော ကျန်းမာရေး ဆွေးနွေးပွဲများကို လုပ်ဆောင်လျက်ရှိကြောင်း၊ မကွေးတိုင်းဒေသကြီးနှင့် ရန်ကုန်တိုင်းဒေသကြီးတို့တွင် ကျင်းပပြီးဖြစ်သည်။