၂၀၁၇ခုနှစ်၊ သြဂုတ်လ ၁၂ ရက်

 ၁၉၄၆-၈၈ လူရည်ချွန်အဖွဲ့(အထက်မြန်မာပြည်) လူရည်ချွန်အဖွဲ့ရုံးအဆောက်အအုံသစ်ဖွင့်ပွဲ၊ တတိယအကြိမ် နှစ်ပတ်လည် တွေ့ဆုံပွဲနှင့် အလုပ်အမှုဆောင် ရွေးချယ်ပွဲ အခမ်းအနားကို သြဂုတ်လ ၁၂ ရက် နံနက် ၈ နာရီက ပြည်ကြီးတံခွန်မြို့နယ်ရှိ လူရည်ချွန်အဖွဲ့ရုံးတွင် ကျင်းပရာ တိုင်းဒေသကြီးအစိုးရအဖွဲ့ ဝန်ကြီးချုပ်၏ဇနီး ဒေါက်တာယုယုမေ(လူရည်ချွန်) တက်ရောက်သည်။

 ရှေးဦးစွာ လူရည်ချွန်များဖြစ်ကြသည့် ပို့ဆောင်ရေးနှင့်ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသန့်စင်မောင်မောင်၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဝန်ကြီး ဒေါက်တာစိုးသန်းနှင့် ဒေါက်တာသန်းဝင်းတို့က အဆောက်အအုံသစ်ကို ဖဲကြိုးဖြတ်ဖွင့်လှစ်ကြသည်။

 ထို့နောက် တိုင်းဒေသကြီးအစိုးရအဖွဲ့ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဝန်ကြီး ဒေါက်တာစိုးသန်း(လေးထပ်ကွမ်းလူရည်ချွန်)က အဖွင့် အမှာစကားပြောကြားပြီး လူရည်ချွန် ၁၉၄၆-၈၈ လူရည်ချွန်အဖွဲ့(အထက်မြန်မာပြည်)ဥက္ကဋ္ဌ ဒေါက်တာဦးမောင်မောင်လေးက ကျေးဇူးတင်စကားပြောကြား သည်။

 ဆက်လက်၍ အလုပ်အမှုဆောင်သစ်ရွေးချယ်ပွဲကို ကျင်းပရာ အထက်မြန်မာပြည်ဥက္ကဋ္ဌ ဒေါက်တာမောင်မောင်လေးက အဖွင့်အမှာစကားပြောကြားပြီး ရန်ကုန်အလုပ်အမှုဆောင်အဖွဲ့ဥက္ကဋ္ဌ၏ သဝဏ်လွှာကို အတွင်းရေးမှူး ဦးကျော်ဌေးက ဖတ်ကြားကာ အထက်မြန်မာပြည် အလုပ်အမှုဆောင်အဖွဲ့၏ နှစ်ပတ်လည်အစီရင်ခံစာကို အတွင်းရေးမှူး ဒေါက်တာလွှမ်းမိုးက လည်းကောင်း၊ နှစ်ပတ်လည်ဘဏ္ဍာရေးအစီရင်ခံစာကို ဘဏ္ဍာရေးမှူး ဒေါ်သွယ်သွယ်မြင့် ကလည်းကောင်း ဖတ်ကြားသည်။

 ယင်းနောက် အလုပ်အမှုဆောင်သစ်ရွေးချယ်တင်မြှောက်ရန်အတွက် ဒေါက်တာသန်းဝင်း ဦးဆောင်သော ကော်မရှင်အဖွဲ့က ဆောင်ရွက်ပြီးအမှုဆောင် များက အဆိုပြုခြင်းနှင့် တက်ရောက်လာကြသူများက အတည်ပြုရွေးချယ်ကြသည်။ ထို့နောက် လူရည်ချွန် (၁၉၄၆-၈၈) အထက်မြန်မာပြည် ဥက္ကဋ္ဌသစ်က နှုတ်ခွန်းဆက်စကားပြောကြားပြီး လူရည်ချွန် ဒေါ်နန်းမြင့်မြင့်လွင်က လူရည်ချွန်အဆောက်အအုံသစ်ဖွင့်ပွဲ အထိမ်းအမှတ် ကဗျာတစ်ပုဒ်ရွတ်ဆို ဂုဏ်ပြုခဲ့ကြ သည်။