၂၀၁၈ခုနှစ်၊ဇူလိုင်လ ၇ ရက်

 ကျောက်ဆည်ခရိုင်၊ တံတားဦးမြို့နယ်ကူးတို့ဆိပ်ကျေးရွာအခြေခံပညာမူလတန်းလွန်ကျောင်းသို့ အလှူရှင်က ဆောက်လုပ်လှူဒါန်းသည့် ချယ်ရီ ကျောင်းဆောင်သစ်လွှဲပြောင်းပေးအပ်ပွဲကို ယနေ့နံနက် ၉နာရီက အဆိုပါကျေးရွာကျောင်း၌ ကျင်းပသည်။

 အခမ်းအနားသို့ မန္တလေးတိုင်းဒေသကြီးအစိုးရအဖွဲ့ စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီး ဒေါက်တာစိုးသန်းနှင့် တိုင်းဒေသကြီးလွှတ်တော် ကိုယ်စားလှယ်များ၊ တိုင်း၊ ခရိုင် ဌာနဆိုင်ရာတာဝန်ရှိသူများ ၊ မြို့နယ်အုပ်ချုပ်ရေးမှူး ဦးလှဝင်းအောင်နှင့်တာဝန်ရှိသူများ၊ အလှူရှင်မိသားစုများ၊ ဆရာ၊ ဆရာမများ၊ ကျောင်းသား၊ကျောင်းသူများ၊ ကျေးရွာပြည်သူများတက်ရောက်ကြသည်။

 ရှေးဦးစွာချယ်ရီကျောင်းဆောင်သစ်ကို မန္တလေးတိုင်းဒေသကြီးအစိုးရအဖွဲ့၊ စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီး ဒေါက်တာစိုးသန်း၊ တိုင်းဒေသကြီးလွှတ်တော်ကိုယ်စားလှယ်၊ မန္တလေးတိုင်းဒေသကြီးပညာရေးမှူးရုံးမှ ဒုတိယညွှန်ကြားရေးမှူးချုပ် ဒေါ်စန်းစန်းရီ၊ ကျောက်ဆည်ခရိုင်ပညာ ရေးမှူး၊ မြို့နယ်အုပ်ချုပ်ရေးမှူးနှင့်မြို့နယ်ပညာရေးမှူးတာဝန်ခံတို့က ဖဲကြိုးဖြတ်ဖွင့်လှစ်ပေးကြသည်။

 ထို့နောက်တိုင်းဒေသကြီးဝန်ကြီးနှင့် တိုင်းဒေသကြီးပညာရေးမှူးရုံးမှ ဒုတိယညွှန်ကြားရေးမှူးချုပ်က အမှာစကားပြောကြားပြီး ကျောင်းဆောင်သစ် အလှူရှင် 100 School Project မှ ကနေဒါနိုင်ငံသား Mr.John Steven က ကျောင်းဆောင်သစ်ဆောက်လုပ်လှူဒါန်းရခြင်း၏ ရည်ရွယ်ချက်များကို ရှင်းလင်းပြောကြားပြီး အလှူရှင်ကကျောင်းဆောင်သစ်နှင့်ပတ်သက်သည့် စာရွက်စာတမ်းများကို ပညာရေးဌာနသို့ လွှဲပြောင်းပေးအပ်ရာ မြို့နယ်ပညာရေး မှူးက လက်ခံရယူပြီး ဂုဏ်ပြုမှတ်တမ်းလွှာကိုပြန်လည်ပေးအပ်သည်။

 ယင်းနောက် အလှူရှင်က ကျောင်းသားကျောင်းသူများအတွက် ကျောင်းဝတ်စုံ ၂၀၁စုံကို ကျောင်းအုပ်ဆရာကြီးသို့ လှူဒါန်းရာ ကျောင်းအကျိုးတော် ဆောင်က ကျေးဇူးတင်စကားပြောကြားပြီး ကျောင်းဆောင်သစ်လွှဲပြောင်းပေးအပ်ပွဲအထိမ်းအမှတ်အလံများကို မြို့နယ်အုပ်ချုပ်ရေးမှူးနှင့်ကျေးရွာအုပ်ချုပ် ရေးမှူးတို့က တာဝန်ရှိသူများသို့ ပေးအပ်ကြသည်။

 

 အဆိုပါကျောင်းသို့ ကနေဒါနိုင်ငံသား Mr.John Steven ၏ လှူဒါန်းမှုမှာ ပေ ၈၀× ပေ ၃၀ အာစီတစ်ထပ်ကျောင်းဆောင်တစ်လုံး၊ သုံးခန်းတွဲ သန့်စင်ခန်း တစ်လုံး၊ လေးယောက်ထိုင်စာရေးခုံ ၃၂လုံး၊ Green Board လေးချပ်၊ အရိပ်ရသစ်ပင် ၅၀၊ ကျောင်းဝတ်စုံ ၂၀၁စုံတို့ လှူဒါန်းခဲ့ခြင်းဖြစ်ပါသည်။