၂၀၁၈ခုနှစ်၊ အောက်တိုဘာလ ၈ ရက်

 ကျန်းမာရေးနှင့်အားကစားဝန်ကြီးဌာန ကျန်းမာရေးလူ့စွမ်းအား အရင်းအမြစ်ဦးစီးဌာန မန္တလေး၊ ဆေးဘက်ဆိုင်ရာနည်းပညာတက္ကသိုလ် Imaging Center ဖွင့်ပွဲအခမ်းအနားကို အောက်တိုဘာ ၇ ရက် နံနက် ၈ နာရီက အဆိုပါတက္ကသိုလ်ခမ်းမ၌ ကျင်းပသည်။

 

 ဖွင့်ပွဲအခမ်းအနားသို့ ကျန်းမာရေးနှင့်အားကစားဝန်ကြီးဌာန ဒုတိယ၀န်ကြီးဒေါက်တာမြလေးစိန်၊ မန္တလေးတိုင်းဒေသကြီးအစိုးရအဖွဲ့ စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဒေါက်တာစိုးသန်း၊ ကျန်းမာရေးလူ့စွမ်းအားအရင်းအမြစ်ဦးစီးဌာန ညွှန်ကြားရေးမှူးချုပ် ဒေါက်တာတင်တင်လေး၊ မန္တလေးဆေးဘက်ဆိုင်ရာနည်းပညာတက္ကသိုလ် ပါမောက္ခချုပ် ဒေါက်တာမြမြအေးတို့ တက်ရောက်ကြပြီး Imaging Center အဆောင်သစ်ကို ဖဲကြိုးဖြတ် ဖွင့်လှစ်ပေးသည်။

 ထို့နောက် တက္ကသိုလ်ခန်းမ၌ ဖွင့်ပွဲအခမ်းအနားကျင်းပရာ ကျန်းမာရေးနှင့်အားကစားဝန်ကြီးဌာန ဒုတိယ၀န်ကြီးက အဖွင့်အမှာစကားပြောကြားရာတွင် “Imaging Center သည် ဆေးဘက်ဆိုင်ရာနည်းပညာ တက္ကသိုလ်အင်္ဂါရပ်နှင့်အညီ ဆောက်လုပ်ပေးထားပြီး ဓာတ်မှန်၊ တီဗွီဓာတ်မှန်စက်များ ထားရှိမည် ဖြစ်ကြောင်း၊ ၄င်းစက်များကို အသုံးပြုပြီး ဘွဲ့ကြို၊ ဘွဲ့လွန် ကျောင်းသား၊ ကျောင်းသူများ ယခုထက်ပို၍ လက်တွေ့နယ်ပယ်တွင် သင်ကြားပေးမည် ဖြစ်သောကြောင့် အကျိုးကျေးဇူးများရရှိပြီး ပြည်သူလူထုကို ကျန်းမာရေးဝန်ဆောင်မှု ပိုမိုပေးနိုင်မည်ဖြစ်ကြောင်း ဆေးဘက်ဆိုင်ရာ ကျွမ်းကျင်ပညာရှင် ဖြစ်အောင် ကြိုးစားကြစေလိုကြောင်း’’ ပြောကြားသည်။

 ထို့နောက် ကျန်းမာရေး လူ့စွမ်းအား အရင်းအမြစ်ဦးစီးဌာန ညွှန်ကြားရေးမှူးချုပ်က ဆေးဘက်ဆိုင်ရာနည်းပညာတက္ကသိုလ်၏ သင်ကြားသော ဘာသာရပ်နှင့်ရည်ရွယ်ချက်များကိုရှင်းလင်းပြောကြားသည်။

 ဆက်လက်၍ ဒုတိယ၀န်ကြီးနှင့်အဖွဲ့သည် Imaging Center အဆောင်သစ် မော်ကွန်းကမ္ပည်းကျောက်စာကို အမွှေးနံ့သာရည်များဖြင့် ပက်ဖျန်းပြီး အဆောင်သစ်ကို လိုက်လံကြည့်ရှုသည်။

 မန္တလေးဆေးဘက်ဆိုင်ရာနည်းပညာတက္ကသိုလ်ကို ၂၀၀၀ ပြည့်နှစ် မေ ၁၂ ရက်တွင် ဖွင့်လှစ်ခဲ့ပြီး ဆေးဘက်ဆိုင်ရာ ပညာရှင် ၁၆၂၃ ဦးနှင့် ဘွဲ့လွန်ပညာရှင် ၃၀ ဦး မွေးထုတ်ပေးနိုင်ခဲ့သည်။