၂၀၁၇ ခုနှစ်၊ ဇူလိုင်လ ၂ ရက်

 မြန်မာနိုင်ငံကိုယ်အင်္ဂါမသန်စွမ်းသူများအသင်း(မန္တလေးတိုင်းဒေသကြီးရုံး)ဖွင့်လှစ်ခြင်း (၇)နှစ်ပြည့် နှစ်ပတ်လည်အခမ်းအနားနှင့် အလှူငွေပေးအပ်ပွဲကို မန္တလေး၊ ချမ်းအေးသာစံမြို့နယ်ရှိ မန္တလေးမြို့တော်ခန်းမတွင် ဇူလိုင် ၁ ရက် နံနက် ၉ နာရီက ကျင်းပသည်။

 ရှေးဦးစွာ သံစဉ်ပန်း မသန်စွမ်းသူများအဖွဲ့က အသင်းကြီး၏ သီချင်းဖြင့် သီဆိုဖွင့်လှစ်သည်။ ထို့နောက် မန္တလေးတိုင်းဒေသကြီးအစိုးရအဖွဲ့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ်က အမှာစကားပြောကြားပြီး မြန်မာနိုင်ငံ ကိုယ်အင်္ဂါမသန်စွမ်းသူများအသင်းချုပ် ဥက္ကဋ္ဌ ဦးမြတ်ဦးက နှုတ်ခွန်းဆက်စကားပြောကြားကာ မြန်မာနိုင်ငံကိုယ်အင်္ဂါမသန်စွမ်းသူများအသင်း(မန္တလေး)မှ အလုပ်အမှုဆောင်များက မိတ်ဆက်ဂါရဝပြုကြသည်။

 ယင်းနောက် မသန်စွမ်း ကျောင်းသား၊ ကျောင်းသူများအား ပညာသင်ထောက်ပံ့ငွေများနှင့် မသန်စွမ်းသူအထောက်အကူပစ္စည်းများအား ပေးအပ်လှူဒါန်း သည်။

 ဆက်လက်၍ အလှူရှင်များက မန္တလေးတိုင်းဒေသကြီးရုံးခွဲ ရန်ပုံငွေအတွက် အလှူငွေများ ပေးအပ်လှူဒါန်းရာ ဝန်ကြီးနှင့်တာဝန်ရှိသူများက လက်ခံရယူ၍ ဂုဏ်ပြုမှတ်တမ်းလွှာများ ပြန်လည်ပေးအပ်ပြီး မန္တလေးတိုင်းဒေသကြီးရုံးခွဲ ဥက္ကဋ္ဌ ဦးစိုင်းထက်အောင်က ကျေးဇူးတင်စကားပြောကြားကာ အခမ်းအနားကို ရုပ်သိမ်းလိုက်သည်။