၂၀၁၈ ခုနှစ်၊ ဇူလိုင်လ ၉ ရက်

 ရတနာပုံတက္ကသိုလ်၏ ပြည်ထောင်စု ငြိမ်းချမ်းရေးညီလာခံ ကြိုဆိုပွဲနှင့် မိုးရာသီ သစ်ပင်စိုက်ပျိုးပွဲတော် အခမ်းအနားကို ဇူလိုင် ၉ ရက် နံနက် ၉ နာရီက ရတနာပုံတက္ကသိုလ်တွင် ကျင်းပရာ တိုင်းဒေသကြီးအစိုးရအဖွဲ့ သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီး ဦးမျိုးသစ် တက်ရောက် အားပေးသည်။

 ရှေးဦးစွာ ပါမောက္ခချုပ် ဒေါက်တာ မောင်မောင်နိုင်က အဖွင့်အမှာစကားပြောကြားပြီး ဧရာဝတီဘဏ်လီမိတက် အထက်မြန်မာပြည် တာဝန်ခံ ဒုတိယ အထွေထွေမန်နေဂျာ ဦးကျော်ဌေးက ဧရာဝတီ ဘဏ်နှင့် Explorer Royal Co.,Ltd တို့မှ ရတနာပုံတက္ကသိုလ်အတွက် သစ်ပင်မျိုးစုံ အပင် ၃၀၀ ကို ပေးအပ်လှူဒါန်းရာ ပါမောက္ခချုပ်က လက်ခံရယူပြီး မှတ်တမ်းတင်ဂုဏ်ပြုလွှာများကို ပြန်လည်ပေး အပ်သည်။

 ပါမောက္ခချုပ် ဒေါက်တာ မောင်မောင်နိုင်က “သဘာဝပတ်ဝန်းကျင်ကို အထောက်အကူပြုနိုင်ရန်နဲ့ ပြည်ထောင်စုငြိမ်းချမ်းရေးညီလာခံကိုလည်း ကြိုဆို ချင်တာပေါ့။ ဆရာ၊ ဆရာမတွေ၊ ကျောင်းသား၊ ကျောင်းသူများနဲ့ တိုင်ပင်လိုက်တယ်။ နောက်ပြီးတော့ သစ်ပင်လှူဒါန်းမယ့် အလှူရှင်လည်းရှိတဲ့အတွက် လုပ်ဖြစ်သွားတာပါ။ မိုးရာသီ သစ်ပင်စိုက်ပျိုးပွဲကတော့ နှစ်စဉ် လုပ်ဖြစ်ပါတယ်။ ယခုနှစ်မှာက ပြည်ထောင်စု ငြိမ်းချမ်းရေးညီလာခံနဲ့ တိုက်ဆိုင်တယ်။ ဒါကိုလည်း ကြိုဆိုချင်တယ်။ တိုင်းပြည်တစ်ခုလုံး ငြိမ်းချမ်းစေချင်တယ်။ ငြိမ်းချမ်းမှ တိုးတက်မယ်ဆိုတဲ့ ရည်ရွယ်ချက်လည်း ပါပါတယ်”ဟု ပြောသည်။

 အဆိုပါ သစ်ပင်စိုက်ပျိုးပွဲတွင် ပါမောက္ခချုပ်  ဒေါက်တာ မောင်မောင်နိုင်၊ မန္တလာဒီဂရီကောလိပ် ကျောင်းအုပ်ကြီး ဒေါက်တာ ဝင်းဆွေ၊ တက္ကသိုလ်များမှ ဒုတိယပါမောက္ခချုပ်များ၊ ဘာသာရပ်ဌာန များမှ ပါမောက္ခ(ဌာနမှူး)များ၊ ဆရာ၊ ဆရာမများ၊ ကျောင်းသား၊ ကျောင်းသူများ၊ စိုက်ပျိုးပင်အလှူရှင်များ ဖြစ်သည့် ဧရာဝတီဘဏ်လီမိတက် အထက်မြန်မာပြည် တာဝန်ခံ ဒုတိယအထွေထွေ မန်နေဂျာ ဦးကျော်ဌေးနှင့်အဖွဲ့ဝင်များက ပျိုးပင်ပေါင်း ၃၀၀ ကို တပျော်တပါး စိုက်ပျိုးကြသည်။ AYA Bank and Explorer Royal Co.,Ltd တို့မှ ပူးပေါင်းစိုက်ပျိုးလျက်ရှိသော သစ်ပင် ၅၀၀၀၀ စိုက်ပျိုးလှူဒါန်းသည့် Project မှ ရတနာပုံတက္ကသိုလ်အတွက် စိန်ပန်းပင် ၄၆ ပင်၊ ခရေပင် ၆၉ ပင်၊ မဲဇယ်ပင် ၆၄ ပင်၊ ဖွားဖက်တော် ၃၇ ပင်၊ တည်ပင် ၆၇ ပင်၊ ငုဝါပင် ၁၇ ပင်၊ စုစုပေါင်း ပျိုးပင် ၃၀၀၊ တက္ကသိုလ်အတွင်းရှိ စိုက်ပျိုးရေးဇုန် ၅ ဇုန်တွင် စိမ်းလန်းစိုပြည်ရေးအတွက် ရည်ရွယ်ပြီး စိုက်ပျိုးကြသည်။