၂၀၁၉ခုနှစ်၊ ဇွန်လ ၄ ရက်

 သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန သစ်တောဦးစီးဌာနကပြုလုပ်သည့် သစ်တောနည်းဥပဒေ(မူကြမ်း)ကို မန္တလေးတိုင်းဒေသကြီးအတွင်းရှိ အကျိုးသက်ဆိုင်သူများ၏ အကြံပြုချက်များရယူခြင်းဆိုင်ရာ ဆွေးနွေးပွဲကို ဇွန်လ ၄ ရက် နံနက် ၈ နာရီခွဲက ၇၈ လမ်း၊ ၃၇ လမ်းနှင့် ၃၈ လမ်းကြား၊ Hotel Mandalay ၌ ကျင်းပသည်။

 အခမ်းအနားတွင် မန္တလေးတိုင်းဒေသကြီး လွှတ်တော်ဥက္ကဋ္ဌ ဦးအောင်ကျော်ဦး၊ မန္တလေးတိုင်းဒေသကြီးအစိုးရအဖွဲ့ သယံဇာတနှင့် သဘာဝပတ်ဝန်းကျင် ထိန်းသ်ိမ်းရေးဝန်ကြီး ဦးမျိုးသစ်၊ မန္တလေးတိုင်းဒေသကြီးသစ်တောဦးစီးဌာန ညွှန်ကြားရေးမှူး ဦးဇော်ဝင်းမြင့်နှင့် တာဝန်ရှိသူများ၊ လွှတ်တော်အသီးသီးမှ ကိုယ်စားလှယ်များ၊ တိုင်းဒေသကြီးအဆင့် ဌာနဆိုင်ရာတာဝန်ရှိသူများ၊ NGO အဖွဲ့များနှင့် ဖိတ်ကြားထားသူများ တက်ရောက်ကြသည်။

 “သစ်တောသယံဇာတများဟာ ကျွန်တော်တို့ဘိုးဘေးဘီဘင်များက ထိန်းသိမ်းစောင့်ရှောက်ခဲ့တဲ့အတွက် လက်ရှိ ကျွန်တော်တို့ရဲ့ လိုအပ်ချက်ကို ဖြည့်ဆည်းပေးနိ်ုင်တာဖြစ်ပြီး ကျွန်တော်တို့ရဲ့နောင်အနာဂတ်မျိုးဆက်များကိုလည်း အကျိုးခံစားနိုင်ရန် အမွေကောင်းများထားခဲ့ပေးနိုင်ရန် သစ်တောများကို စနစ်တကျ စီမံအုပ်ချုပ်သွားဖို့အတွက် ခိုင်မာအားကောင်းတဲ့ ဥပဒေ၊ နည်းဥပဒေတွေ လိုအပ်ပါတယ်။

 လွန်ခဲ့သော ဆယ်စုနှစ်များအတွင်း တရားဥပဒေစိုးမိုးသက်ရောက်မှု အားနည်းခြင်းနဲ့ နယ်စပ်ဒေသတွေမှာ ပဋိပက္ခပြသာနာတွေဖြစ်နေခြင်းတို့ကြောင့် တရားမဝင်သစ်ထုတ်လုပ်မှုတွေ တဟုန်ထိုးမြင့်တက်လာတဲ့အပြင် နိုင်ငံတော်ရဲ့လူမှုစီးပွားဖွံ့ဖြိုးတိုးတက်ရေး ဆောင်ရွက်ရာမှ သစ်တောသယံဇာတအပေါ် မှီခိုနားထားမှု မြင့်မားလာတာနဲ့အမျှ တရားဝင် သစ်အလွန်အကျွံထုတ်ယူသုံးစွဲမှုတွေကြောင့် အကျိုးဆက်အားဖြင့် သစ်တော အတန်းအစားတွေ ကျဆင်းခြင်းတို့ကို ရင်ဆိုင်ကြုံတွေ့နေရပြီဖြစ်ပါတယ်။

 ဒီမိုကရေစီနိုင်ငံတော်အဖြစ် တည်ဆောက်နေတဲ့ ပြုပြင်ပြောင်းလဲရေးကာလမှာ ခေတ်စနစ်နဲ့ မလျော်ညီတော့တဲ့၊ ပြောင်းလဲသင့်တဲ့ ဥပဒေတွေ၊ နည်းဥပဒေတွေ ပြန်လည်သုံးသပ်ပြင်ဆင်ခြင်း၊ အသစ်ပြန်လည်ရေးဆွဲခြင်းတွေ ဆောင်ရွက်လျက်ရှိပါတယ်” ဟု သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီး ဦးမျိုးသစ်က အဖွင့်အမှာစကားတွင် ပြောကြားသည်။

 သစ်တောများပြုစုပျိုးထောင်ရေးနှင့် ထိန်းသိမ်းကာကွယ်ရေးအတွက် ဥပဒေ၊ နည်းဥပဒေ၊ လုပ်ထုံးလုပ်နည်းများ၊ အမိန့်ညွှန်ကြားချက်များ ထုတ်ပြန်ပြဋ္ဌာန်း ဆောက်ရွက်လျက်ရှိသည့်အပြင် နှစ်တို၊ နှစ်ရှည် စီမံကိန်းများ ရေးဆွဲချမှတ် အကောင်အထည်ဖော်ဆောင်ရွက်လျက်ရှိသည်။

 “အသစ်ပြဋ္ဌာန်းလိုက်တဲ့ သစ်တောဥပဒေမှာ ဒေသခံတိုင်းရင်းသားပြည်သူတွေနဲ့ ပုဂ္ဂလိက လုပ်ငန်းရှင် တွေအတွက် ထက်ရှားတဲ့ အခွင့်အလမ်းတွေကို ဥပဒေနဲ့အညီ ဆောင်ရွက်ခွင့်ပြုထားတာတွေ့ရမှာဖြစ်ပါတယ်၊ အဲ့ဒါတွေက ဝန်ကြီးဌာန နေပြည်တော်ကောင်စီ၊ တိုင်းဒေသကြီး၊ ပြည်နယ်အစိုးရအဖွဲ့ရဲ့ သဘောထားမှတ်ချက်၊ ပြည်ထောင်စုအစိုးရအဖွဲ့ရဲ့သဘောတူညီချက်နဲ့ ဒေသခံတွေက ၎င်းတို့ရဲ့ဓလေ့ထုံးတမ်းအရ ထိန်းသိမ်းထားတဲ့ သဘာဝသစ်တောတွေ၊ ဒီရေတောတွေကို အသိအမှတ်ပြုနိုင်ခဲ့ခြင်း၊ နိုင်ငံတော်အတွင်းမည်သည့်နေရာတွင်မဆို ပေါက်ရောက်နေတဲ့ ကျွန်းပင်ကို နိုင်ငံတော်ပိုင် သတ်မှတ်ထားသော်လည်း စိုက်ပျိုးထားတဲ့ကျွန်းပင်တွေနဲ့ စပ်လျဉ်းပြီး သီးခြား အမိန့်၊ ညွှန်ကြားချက် ထုတ်ပြန်ရေး၊ ပိုင်ဆိုင်ခွင့်၊ ကုန်သွယ်ခွင့် ပြုနိုင်ခြင်း၊ ကြိုးဝိုင်း၊ ကြိုးပြင်ကာကွယ်တောဖွဲ့စည်းသတ်မှတ်ခြင်းဆိုင်ရာ ကိစ္စရပ်တွေမှာ ဒေသခံတိုင်းရင်းသားပြည်သူတွေကို ပါဝင်ခွင့်ပြုခြင်း၊ ဒေသခြံ့ပည်သူအစုအဖွဲ့ပိုင် သစ်တောလုပ်ငန်းတွေကို အကောင်အထည်ဖော်ခြင်းနဲ့ အကာအကွယ်ပေးခြင်းတွေကို ဆောင်ရွက်နိုင်ခြင်း၊ ပုဂ္ဂလိက သစ်တော စိုက်ခင်း စိုက်ပျိုးပြုစုထိန်းသိမ်းခြင်းလုပ်ငန်းတွေ ဆောင်ရွက်နိုင်ခြင်းတို့ဖြစ်ပါတယ်၊ ဒေသခံတိုင်းရင်းသားတွေနဲ့ လက်ရှိသစ်တောမြေနဲ့ အရင်းအမြစ်များ အသုံးချနေမှု အနေအထားနဲ့ ဥပဒေပါပုဒ်များအပေါ် အခြေခံပြီး ဥပဒေနဲ့ နည်းဥပဒေ အားကောင်းလာစေရေးအတွက် အကြံပြုပေးဖို့ ဖိတ်ခေါ်ပါတယ်၊ သစ်တောထိန်းသိမ်းကာကွယ်ရေးမှာလည်း ထိရောက်စေရေးအတွက် ပြစ်မှုနဲ့ပြစ်ဒဏ်တွေ တိုးမြှင့်ထားတာတွေ့ရမှာဖြစ်ပါတယ်” ဟု ၎င်းက ဆက်လက် ပြောသည်။

 သစ်တောဦးစီးဌာနနဲ့ အကျိုးသက်ဆိုင်သူများပါဝင်သည့် ပွင့်လင်းမြင်သာမှုရှိပြီး အားကောင်းသော  ပူးပေါင်းဆောင်ရွက်မှုလုပ်ငန်းစဉ် တစ်ခုအဖြစ် ထိရောက်အောင်မြင်စွာ ဆောင်ရွက်နိုင်ရန်၊ အကျိုးသက်ဆိုင်သူများနှင့် အပြုသဘောဆောင်သော ညှိနှိုင်းဆွေးနွေးမှုများမှ တစ်ဆင့်အကျိုးသက်ဆိုင်သူများ အကြား အပြန်အလှန်နားလည်မှုနှင့် ယုံကြည်မှုများ တိုးမြင့်ရရှိလာစေရန်၊ အကျိုးသက်ဆိုင်သူများအား သစ်တောဥပဒေနှင့် သစ်တောနည်းဥပဒေများကို သေချာစွာ နားလည်သဘောပေါက်စေပြီး လုံခြုံအဆင်ပြေချောမွေ့သော အခင်းအကျင်းများ ပံ့ပိုးပေး၍ လွတ်လပ်စွာအကြံဉာဏ်များပေးနိုင်ရန်၊ အကျိုးသက်ဆိုင်သူများ၏ ဆွေးနွေးအကြံပြုချက်များကို သေချာစွာ စနစ်တကျမှတ်တမ်းတင်သွားရန်တို့်မှာ ဆွေးနွေးပွဲ၏ ရည်မှန်းချက်များဖြစ်သည်။

 ဆွေးနွေးပွဲတွင် သစ်တောပြုစုထိန်းသိမ်းရေးဆိုင်ရာကိစ္စရပ်များ၊ ဒေသခံတိုင်းရင်းသားပြည်သူများ၏ အကျိုးစီးပွားဆိုင်ရာကိစ္စရပ်များ၊ ခိုင်မာအားကောင်းသည့် နည်းဥပဒေတစ်ရပ်ဖြစ်ပေါ်လာရေးအထောက်အကူပြုရန် အများအကျိုးပြုပြီး ကောင်းမွန်သည့် အကြံပြုချက်များရရှိနိုင်ရန် တက်ရောက်လာသူများက ဝိုင်းဝန်းဆွေးနွေးခဲ့ကြသည်။