၂၀၁၈ ခုနှစ်၊ ဇူလိုင်လ ၃ ရက်

 မန္တလေးတိုင်းဒေသကြီးအတွင်းရှိ ဝန်ထမ်းအိမ်ရာများတွင် အခြေခံပညာရေးဝန်ထမ်းများအား ၅၀ ရာခိုင်နှုန်း ဦးစားပေးရွေးချယ်၍ နေရာချထားပေးမည် ဖြစ်ကြောင်း တိုင်းဒေသကြီးအစိုးရအဖွဲ့ လျှပ်စစ်၊ စွမ်းအင်နှင့် ဆောက်လုပ်ရေးဝန်ကြီးဌာန၏ ဝန်ထမ်းအိမ်ရာချထားရေးမူဝါဒအရ သိရသည်။

 အဆိုပါ မူဝါဒအရ ဆောက်လုပ်သည့် ဝန်ထမ်းအိမ်ရာအရေအတွက်၏ ငါးဆယ်ရာခိုင်နှုန်းတွင် ပထမဦးစားပေးအဖြစ် အခြေခံပညာရေးဝန်ထမ်းများအား လည်းကောင်း၊ ဒုတိယဦးစားပေးအဖြစ် လစာနည်း ဝန်ထမ်းများအားလည်းကောင်း၊ တတိယဦးစားပေးအဖြစ် လုပ်သက်ရင့်ဝန်ထမ်းများအားလည်းကောင်း၊ လျှောက်ထားသူဝန်ထမ်း၏ အိမ်ထောင်ဘက်သည်လည်း ဝန်ထမ်းဖြစ်ပါက စတုတ္ထဦးစားပေးအနေဖြင့် ရွေးချယ်သွားမည်ဖြစ်ကြောင်း တိုင်းဒေသကြီး လျှပ်စစ်၊ စွမ်းအင်နှင့် ဆောက်လုပ်ရေးဝန်ကြီး ဦးဇာနည်အောင်ကပြောသည်။

 “ကျွန်တော်တို့က ဝန်ထမ်းအိမ်ရာနဲ့ပတ်သက်ပြီး အလွန်အလေးထားလုပ်ဆောင်နေပါတယ်။ မြို့နယ်အလိုက် ဝန်ထမ်းအင်အားနဲ့ အိမ်ရာပေးနိုင်မှုကို အမြဲ ဆန်းစစ်ပြီး မြေနေရာရတာနဲ့ အိမ်ရာတွေ ဆောက်လုပ်ပေး ဖို့ ကြိုးစားနေပါတယ်။ အခြေခံပညာရေးဆရာ၊ ဆရာမတွေက ကျွန်တော်တို့ နိုင်ငံသားတွေရဲ့ နှလုံးသားတွေကို တပ်ဆင်ပေးနေကြသူတွေပါ။ ဒါ့ကြောင့် ကောင်းမွန်တဲ့ နှလုံးသားတွေကို တပ်ဆင်ပေးနေတဲ့ ဆရာ၊ ဆရာမတွေက သူတို့ရဲ့ အသက် မွေးဝမ်းကျောင်းအလုပ်မှာ ယုံကြည်ကိုးစားမှုရှိပြီး လုပ်နိုင်အောင် အိမ်ရာတွေကို ဦးစားပေး ချထားပေးဖို့ မူဝါဒချမှတ်ထားပါတယ်။ ဒါ့အပြင် အိမ်ထောင် မရှိတဲ့ ဝန်ထမ်းတွေအနေနဲ့ ခြောက်ယောက်နှုန်းနဲ့ တစ်ခန်း နေထိုင်ခွင့်လျှောက်ထားရင်လည်း ဦးစားပေး နေရာချထားပေးမှာပါ”ဟု ဝန်ကြီးပြောကြား သည်။

 လက်ရှိတွင် မန္တလေးတိုင်းဒေသကြီးအတွင်း၌ တာဝန်ထမ်းဆောင်နေကြသော ဝန်ထမ်းအရေအတွက်မှာ (၅၆၁၆၂)ဦးရှိသည့်အနက် တိုင်းဒေသကြီး မြို့ပြနှင့်အိမ်ရာဖွံ့ဖြိုးရေးဦးစီးဌာနမှ ၂၀၁၈-၂၀၁၉ (၆)လ ဘတ်ဂျက်အထိ ဝန်ထမ်းအိမ်ရာချထားပေးနိုင်မှုအနေဖြင့် ၅ ဒဿမ ၃၅ ရာခိုင်နှုန်းရှိပြီး တိုင်းဒေသကြီးအတွင်း သက်ဆိုင်ရာဌာနများအလိုက် အိမ်ရာများ တည်ဆောက်ပြီး နေရာချထားပေးမှုများ ၂၄ ဒဿမ ၃၅ ရာခိုင်နှုန်းအထိ ရှိနေပြီဖြစ် သည်။

 ထို့အပြင် ဝန်ထမ်းအိမ်ရာတွင် နေထိုင်ခွင့်ရရှိသူများမှ အိမ်ခန်း ငှားရမ်းခအဖြစ် အမှုထမ်းဝန်ထမ်းဖြစ်ပါက လစာရဲ့ ၃ ရာခိုင်နှုန်းနှင့် အရာထမ်းဝန်ထမ်း ဖြစ်ပါက လစာရဲ့ ၅ ရာခိုင်နှုန်း သတ်မှတ်ထားသည်။

 လက်ရှိတွင် မန္တလေးတိုင်းဒေသကြီး၊ ပုသိမ်ကြီးမြို့နယ်၊ မဲကင်းကုန်းကျေးရွာအနီးတွင် တိုင်းဒေသကြီးအစိုးရဘတ်ဂျက်ဖြင့် အကောင်အထည်ဖော် ဆောင်ရွက်နေသည့် ဝန်ထမ်းအိမ်ရာပေါင်း (၂၆၀)မှာ ပြီးစီးသွား ပြီဖြစ်သည့်အတွက် နေရာချထားပေးနိုင်ရန် စိစစ်ရွေးချယ်လျက်ရှိသည်။