၂၀၁၇ ခုနှစ်၊ သြဂုတ်လ ၇ ရက်

 မန္တလေးတိုင်းဒေသကြီး မွေးမြူရေးနှင့် ကုသရေးဦးစီးဌာန၊ မြန်မာနိုင်ငံမွေးမြူရေးလုပ်ငန်းအဖွဲ့ချုပ်နှင့် တိရစ္ဆာန်ဆေးကုဆရာဝန်များ(မန္တလေး)တို့ ပူးပေါင်း ၍ ကြက်ဥ၊ ကြက်သားစားသုံးမှုမြှင့်တင်ရေးဆိုင်ရာ အသိပညာပေးဟောပြောဆွေးနွေးပွဲကို ယနေ့ နံနက် ၉နာရီမှ ၁၂နာရီအထိ ၂၇လမ်းနှင့် ၆၄ လမ်းထောင့်ရှိ Oriental House ခန်းမတွင် ပြုလုပ်သည်။

 ဟောပြောဆွေးနွေးပွဲသို့ မန္တလေးတိုင်းဒေသကြီးအစိုးရအဖွဲ့ တိုင်းရင်းသားရေးရာဝန်ကြီး ဦးစိုင်းကျော်ဇောနှင့်အဖွဲ့ဝင်များ၊ လွှတ်တော်ကိုယ်စားလှယ်များ၊ ဆရာဝန်များ၊ ပညာရှင်များ၊ ဖိတ်ကြားထားသူများ တက်ရောက်ကြသည်။

 စဖြစ်တဲ့အချိန်မှာ အစိုးရအနေနဲ့ စိုးရိမ်မှုတွေ ရှိခဲ့ပါတယ်။ လူတွေမှာ ပြန့်ပွားမှုမရှိရလေအောင် တောင်ပြုန်းပွဲကို ရက်ရွှေ့ဆိုင်းလိုက်ရပ်တယ်၊ ရာသီအလိုက်ဖြစ်တတ်တဲ့ရောဂါမှာ ပြင်းထန်မှုရှိတဲ့အတွက်ကြောင့် စိုးရိမ်မှုတွေရှိပါတယ်၊ စိုးရိမ်စိတ်နဲ့အတူ လူတွေ ကြက်သား၊ ကြက်ဥစားသုံးမှု ကြက်ငှက်တုပ်ကွေးရောဂါနဲ့ရောပြီး စိုးရိမ်စိတ်တွေဝင်လာပြီးမစားကြတော့ဘူး။

 စိုးရိမ်စိတ်နဲ့ မစားကြတဲ့အခါ မွေးမြူရေးသမားတွေ၊ ကြက်ဥသမားတွေမှာ အရှုံးပေါ်လာကြတဲ့အခြေအနေမျိုးဖြစ်လာကြတယ်၊ မဖြစ်စေချင်ပါဘူး၊ စီးပွားရေးတစ်ခုတိုးတက်ဖွံ့ဖြိုးဖို့ဆိုတာက စားသုံးမှုဆိုင်ရာ ကိစ္စအရပ်ရပ်နဲ့ပတ်သက်ပြီး စီးပွားရေးဟာတိုးတက်မှု၊ ကျဆင်းမှုဆိုတာဖြစ်လာတာပါ။

 နိုင်ငံတကာရဲ့ စီးပွားရေးအခြေအနေကိုကြည့်ရင် စိုက်ပျိုးရေး၊ မွေးမြူရေးဟာ အဓိကအခန်းကဏ္ဍမှာ ရပ်တည်နေပါတယ်၊ လူတိုင်းဟာ စားရေးအတွက် အမြဲတမ်းရုန်းကန်နေရသလိုပဲ အမြဲတမ်းရှာဖွေနေရပါတယ်၊ အစားအစာတစ်ခုရှားပါးမှုဖြစ်လာပြီဆိုရင် စီးပွားရေးလုပ်တဲ့ လုပ်ငန်းရှင်တွေဟာ စီးပွားရေး ကျဆင်းလာပါတယ်။

 ဆရာဝန်တွေရဲ့ သုံးသပ်ချက်၊ ဓါတ်ခွဲခန်းပညာရှင်တွေရဲ့ သုံးသပ်ချက်အရ ကြက်ငှက်တုပ်ကွေး H5N1 နဲ့ H1N1 မတူညီတာရှင်းလင်းပြတဲ့အခါမှာ ရဲရဲတင်းတင်း စားသုံးဖို့ပါပဲ ဟု တိုင်းရင်းသားရေးရာဝန်ကြီး ဦးစိုင်းကျော်ဇောက ပြောသည်။

 ဆက်လက်၍ မြန်မာနိုင်ငံ တိရစ္ဆာန်ဆေးကုဆရာဝန်များအသင်းဥက္ကဌ၊ မွေးမြူရေးဆိုင်ရာ ဆေးတက္ကသိုလ် ပါမောက္ခချုပ်(ငြိမ်း)၊ မွေးမြူရေးနှင့်ကုသရေး ဦးစီးဌာန ညွှန်ကြားရေးမှူးချုပ်(ငြိမ်း) ဒေါက်တာမြင့်သိန်းက H1N1 pandemic 2009 တုပ်ကွေးသည် ကြက်ငှက်တုပ်ကွေး မဟုတ်ကြောင်း၊ လူလူချင်းကူးသော လူတုပ်ကွေးဖြစ်ကြောင်း၊ ကြက်ငှက်တုပ်ကွေး H5N1 နှင့် လူမှာဖြစ်သည့် တုပ်ကွေး H1N1 နှစ်ခုအကြား မျိုးရိုးရောထွေးခြင်းမရှိတာ တွေ့ရပါကြောင်း၊ ၂၀၀၉ခုနှစ်မှ စတင်ဖြစ်ပွားခဲ့သော တုပ်ကွေး H1N1သည် လူများတွင်သာကူးစက်သော လူတုပ်ကွေးပိုးသစ်ဖြစ်ပြီး ဝက်တုပ်ကွေး ဗိုင်းရပ်စ်ပိုးနှင့် ဆက်စပ်မှုမရှိကြောင်း၊ H1N1 လူတုပ်ကွေးသည် ကြက်သား၊ ကြက်ဥနှင့် လုံးဝမသက်ဆိုင်ကြောင်းတို့ကို အသိပညာပေးပြောကြားခဲ့သည်။

 အစီအစဉ်အတိုင်း ဆက်လက်ကျင်းပရာ မန္တလေးတိုင်းဒေသကြီး စားသုံးသူအငြင်းပွားမှုဖြေရှင်းရေးအဖွဲ့၊ တိုင်းရင်းဆေးတက္ကသိုလ်ပါမောက္ခချုပ်(ငြိမ်း) ဒေါက်တာအောင်မြင့်နှင့် မန္တလေးတိုင်းဒေသကြီး၊ မြန်မာနိုင်ငံမွေးမြူးရေးလုပ်ငန်းအဖွဲ့ချုပ်ဥက္ကဌတို့က ဟောပြောခဲ့ကြောင်းနှင့် တက်ရောက်လာသူများ၏ သိလိုသည်များကို ပြန်လည်ဖြေကြားခဲ့သည်။