၂၀၁၉ ခုနှစ်၊ ဇန်န၀ါရီလ ၁၉ ရက်

  တိုင်းရင်းသားအခွင့်အရေးများဆိုင်ရာ ပညာပေးဟောပြောခြင်းနှင့် တိုင်းရင်းသားရေးရာအခြေခံအချက်များ ကောက်ယူခြင်းအစီအစဉ်ကို ဇန်နဝါရီ ၁၉ ရက် နံနက် ၉ နာရီက ရှမ်းတိုင်းရင်းသားများ သာရေးနာရေးအသင်း၌ ကျင်းပသည်။

 ရှေးဦးစွာ မန္တလေးတိုင်းဒေသကြီးအစိုးရအဖွဲ့ ရှမ်းတိုင်းရင်းသားရေးရာဝန်ကြီး ဦးစိုင်းပန်းဆိုင်က “တိုင်းရင်းသားလူမျိုးများရေးရာဝန်ကြီးဌာန၊ တိုင်းရင်းသား အခွင့်အရေးများကာကွယ်စောင့်ရှောက်ရေးဦးစီးဌာနက တိုင်းရင်းသားအခွင့်အရေး ကာကွယ်စောင့်ရှောက်သည့် ဥပဒေပါအချက်အလက်များကို အသိပညာပေးဆွေးနွေးရန်နှင့် တိုင်းရင်းသားများ၏ အခြေခံအချက်အလက်များကို ကောက်ယူရန် ကျင်းပခြင်းဖြစ်ကြောင်း၊ ဒေသခံတိုင်းရင်းသားများ အနေဖြင့် ဥပဒေပါအခွင့်အရေးနှင့် ရပိုင်ခွင့်များကို သိရှိနားလည်စေရန် စစ်တမ်းကောက်ယူခြင်းမှ ရရှိလာသော အခြေခံအချက်များကို စိစစ်သုံးသပ်ပြီး တိုင်းရင်းသားအခွင့်အရေးများဆိုင်ရာ အမျိုးသားအဆင့် မဟာဗျူဟာတစ်ရပ် ရေးဆွဲနိုင်ရန်နှင့် တိုင်းရင်းသားလူမျိုးများ၏ လူမှုစီးပွားဘဝ တိုးတက် မြင့်မားရေးအတွက် ဆက်စပ်ဝန်ကြီးဌာနများ၊ အဖွဲ့အစည်းများနှင့် ပေါင်းစပ်ညှိနှိုင်းဆောင်ရွက်နိုင်ရန် စသော ရည်ရွယ်ချက်များဖြင့် ကျင်းပရခြင်းဖြစ်ကြောင်း၊ မိမိတို့တိုင်းရင်းသားများ၏ ရပိုင်ခွင့်များ၊ ကာကွယ်စောင့်ရှောက်ပိုင်ခွင့်များကို သိရှိနားလည်ပြီး တိုင်းရင်းသားများ၏အကျိုးကို ပူးပေါင်းဖော်ဆောင်သွားကြရ မည်ဖြစ်ကြောင်း”ဖြင့် အဖွင့်အမှာစကားတွင် ထည့်သွင်းပြောကြားသည်။

 ဆက်လက်၍ တိုင်းရင်းသားအခွင့်အရေးများ ကာကွယ်စောင့်ရှောက်ရေးဦးစီးဌာန ဒုတိယညွှန်ကြားရေးမှူး ဒေါ်သန်းသန်းညိုကို ဝန်ကြီးဌာနအကြောင်း မိတ်ဆက်ပြီး တိုင်းရင်းသားလူမျိုးများ၏အခွင့်အရေးများ ကာကွယ်စောင့်ရှောက်သည့်ဥပဒေကို ရှင်းလင်းပြီး လက်ထောက်ညွှန်ကြားရေးမှူး ဒေါ်ငြိမ်းနုဝေက တိုင်းရင်းသားရေးရာအခြေခံစစ်တမ်းကောက်ယူခြင်းအချက်အလက်များကို ရှင်းလင်းသည်။

 ယင်းနောက် တက်ရောက်လာကြသည့် တိုင်းရင်းသားလူမှုအစုအဖွဲ့များ၊ တိုင်းရင်းသားစာပေနှင့် ယဉ်ကျေးမှုအဖွဲ့များမှ တာဝန်ရှိသူများ၊ ဌာနဆိုင်ရာများက တိုင်းရင်းသားရေးရာအခြေခံအချက်များကို စုပေါင်းကောက်ယူခဲ့ကြသည်။